धनगढी- कैलाली निर्वाचन क्षेत्र नम्बर ५ बाट प्रतिनिधिसभा सदस्यका लागि गठबन्धनका साझा डिल्लीराज पन्तले आफ्नो पार्टीको नेतृत्वमा सरकार नहुँदा पनि काम गर्न गाह्रो हुने गरेको बताएका छन् । चुनावी प्रचार–प्रसारका क्रममा शनिबार धनगढी उपमहानगरपालिका वडा नम्बर ११ मा टोल भेलालाई सम्बोधन गर्दै उनले यस्तो बताएका हुन् ।

उनले यसअघि आफू प्रदेशसभा सदस्य हुँदा पनि प्रदेशमा आफ्नो सरकार नहुँदा जनताको चाहाना अनुसार काम गर्न नसकेको बताए । ‘प्रदेशमा बाम गठबन्धनको सरकार हुँदा काँग्रेसका सांसदले मागेका योजनामा भनेजति बजेट पाउन सकेनौं,’ उनले भने, ‘जनचाहाना अनुसार काम गर्न पनि आफ्नो पार्टीको नेतृत्वमा सरकार हुन आवश्यक हुन्छ ।’ उनले अब आगामी सरकार गठबन्धन दलको नेतृत्वमा बन्ने भएकाले गठबन्धनका उम्मेदवारलाई भोट दिएर जिताउन आग्रह गरे ।

उम्मेदवार पन्तले देशको विकास र समृद्धिका लागि गठबन्धन सरकार आवश्यक रहेको बताए । उनले जनताले परिवर्तन चाहेको र त्यसको नेतृत्व अब गठबन्धन सरकारले गर्ने बताए । त्यसैका लागि अहिले गठबन्धन बनेको उनको भनाइ छ ।