बैतडी- बैतडीमा प्रहरी चढेको जिप दुर्घटना हुँदा पाँच जनाको घटनास्थलमै मृत्यु भएको छ । सोमबार बिहान पाटन नगरपालिका–४ को थुममा प्रहरी बोकेको से १ ज ८५४ नम्बरको जिप दुर्घटना हुँदा पाँच जनाको मृत्यु भएको वडाध्यक्ष दीपक विष्टले जानकारी दिए ।

‘अहिलेसम्म हामीले पाँच जनाको शव भेटेका छौँ । तीन जना प्रहरी घाइते अवस्थामा भेटिनुभएको छ,’ वडाध्यक्ष विष्टले भने, प्रहरी टोली घटनास्थलतर्फ आउँदैछ ।’ प्रहरीले भने घटनाको यकिन विवरण दिन सकिरहेको छैन । जिप सडकबाट करिब एक सय मिटर तल भीरमा खसेको छ ।

प्रहरीको घुम्ती टोली सवार उक्त जिप बैतडीबाट पाटनतर्फ आइरहेको बुझिएको छ । जिल्ला प्रहरी कार्यालय र इलाका प्रहरी कार्यालय पाटनको टोली घटनास्थलतर्फ गइरहेको छ ।