काठमाडौं- श्रम, रोजगार तथा सामाजिक सुरक्षा मन्त्री शेरबहादुर कुुँवरले सरकारबाट जाँदाजाँदै आफूले गरेका कामको फेहरिस्त सार्वजनिक गरेका छन् । ५ महिना २८ दिन श्रम मन्त्रालयको जिम्मेवारी सम्हालेका कुँवर नयाँ सरकार बन्ने भएपछि आफ्नो प्रगति वितरण सार्वजनिक गरेर बाहिरिएका हुन् ।
उनी श्रम मन्त्री हुँदा प्रधानमन्त्री रोजगार कार्यक्रम, युवा रोजगारीका लागि रुपान्तरण पहल परियोजना, रोजगार प्रवर्द्धन कार्यक्रम र वैदेशिक रोजगारीवाट फर्किएका व्यक्तिहरुको पुनः एकीकरण परियोजना प्रदेश तथा स्थानीय तहवाट कार्यान्वयन गरिएको छ ।
साथै, रोजगारी सम्वन्धी कार्यक्रमहरुको एकीकृत तथ्याङ्क व्यवस्थापनको लागि राष्ट्रिय रोजगार व्यवस्थापन सूचना प्रणालीको विकास गर्ने र रोजगारीको एकीकृत राष्ट्रिय प्रणालीको ढाँचा सिफारिस, श्रमको सम्मान गर्दै स्वदेशमा नै रोजगारी गर्न उत्प्रेरित गर्ने उद्देश्यले श्रमको सम्मान राष्ट्रियको अभियान कार्यक्रम सञ्चालन, श्रमिक अस्पतालको निर्माण सम्भाव्यता अध्ययन कार्यदलले अस्पताल निर्माण सम्भाव्य स्थल र सञ्चालनका लागि जग्गाको पहिचान र श्रमिक अस्पताल निर्माणका लागि डिपिआर समेत तयार गर्ने कार्य भएको छ ।
देशको श्रम वजारमा प्रवेश गर्ने सम्पुर्ण जनशक्तिलाई स्वदेशमा नै रोजगारी उपलब्ध गराउने उद्देश्यले उनीहरुको क्षमता विकास गरी व्यावसायिक सीप तथा तालिम प्रदान गर्ने कार्यक्रमलाई प्रभावकारीरुपमा सञ्चालन गर्ने कार्य, वजारमा उपलब्ध जनशक्तिलाई सीपयुक्त वनाई रोजगार, स्वरोजगार र उद्यमशीलता अभिवृद्धि वनाउन व्यवसायिक सीप विकास तथा तालिम सञ्चालन र सीपलाई रोजगारीसँग आवद्ध गर्न कार्यस्थलमा आधारित तालिम सञ्चालनको प्रस्ताव उनैक कार्यकालमा गरिएको थियो ।
श्रमिकहरुको हकहितलाई ध्यानमा राखी नयाँ श्रम गन्तव्य मुलुकको खोजी र श्रम सम्झौताको नवीकरण गर्ने कार्यलाई अगाडि वढाइएको छ । साउदी अरेविया, सेसेल्ससँग नयाँ श्रम सम्झौता एवं संयुक्त अरव इमिरेट्स, मलेसिया र कतारसँग भएका श्रम सम्झौतालाई समसामयिक परिमार्जन÷पुनरावलोकन गर्ने कार्य प्रारम्भ भएको छ ।
विदाई कार्यक्रममा बोल्दै उनले ‘श्रममन्त्रीको पदबाट विदाई भएपनि जनताका लागि पाँच वर्ष काम गर्ने प्रतिबद्धता जनाए । कुँवर नेकपा (एर्कीकृत समाजवादी)बाट २०७९ असार १३ गते श्रम मन्त्रालयको नेतृत्वमा आएका थिए ।
श्रम मन्त्रालयबाट बाहिरिए पनि संसद भएका कारण पाँच वर्ष सरकारको काम–कारवाही र जनताको समस्या बोकेर सिंहदरवार आइरहने समेत उनले पत्रकार सम्मेलनमा जानकारी दिए ।
वैदेशिक रोजगारी, आन्तरिक श्रम बजार र श्रम क्षेत्रका धेरै काम गर्ने बाँकी थिए । छोटोअवधिमा सकेजति काम गरेको उनको दाबी थियो । श्रम देशको अर्थतन्त्रसँग जोडिएको महत्वपूर्ण मन्त्रालय हो । त्यही भएर यो मन्त्रालय सुधार्ने धेरै काम गर्ने बाँकी रहेको जाँदै–गर्दा उनले आफनो भनाइ राखे ।
नयाँ सरकार बनेको छ । त्यो सरकारबाट आउने श्रममन्त्रीले आफूले ल्याएका योजना कार्यान्वयन गर्ने उनको विश्वास छ । सरकारले वैदेशिक रोजगारीलाई आगामी दिनमा प्राथमिकतामा राख्नु नहुने उनले बताए ।
जहिले रेमिट्यान्स भनेर बस्दा देशले श्रमको नोक्सानी ब्येहोर्ने उनको भनाइ छ । सरकारले देशमा काम गर्ने इच्छुक युवा पुस्ताका लागि श्रम ऐनमा सुविधा बढाएर आकर्षण थप्नुपर्ने श्रममन्त्री भएर काम गर्दा अनुभव गरेको उनले सुनाए ।
