धनगढी – नागरिक उन्मुक्ति पार्टीकी केन्द्रीय अध्यक्ष रञ्जिता श्रेष्ठ चौधरीले सुदूरपश्चिम प्रदेशको सभामुख चयनमा सत्तारुढ दललाई समर्थन गर्न निर्देशन दिएकी छिन् ।
सोमबार धनगढी पुगेकी अध्यक्ष श्रेष्ठले प्रदेश सभा सदस्यहरुसँग भेट्दै सभामुख चयनमा सरकारलाई समर्थन गर्न निर्देशन दिएकी हुन् ।
साथै उनले सभामुखमा समर्थन गरेपनि प्रदेश सभा सदस्यहरूलाई प्रतिपक्षमा बस्न निर्देशन दिएकी छन् । तर सुदूरपश्चिम प्रदेश सभामा भने सो दलका सदस्यहरु सत्तापक्षमै बसेका छन् । प्रदेशमा नाउपाले निर्णय लिन नसक्दा सुदूरपश्चिम प्रदेशले सभामुख पाउन सकेको छैन ।
यहाँ माओवादी केन्द्रबाट भीम भण्डारी र नेपाली काङ्ग्रेसबाट मनाबहादुर रावल सभामुखका उम्मेदवार छन् । बहुमत पाउन २७ सांसद आवश्यक पर्छ ।
बहुमत दुवैको नपुगेपछि शनिवार पनि सभामुख चयन हुन सकेको थिएन । आज बसेको बैठक पनि स्थगित भएको थियो ।
५३ जना प्रदेश सभा सदस्य रहेको यहाँ कांग्रेसका १९, माओवादीका ११, एमालेका १० नागरिक उन्मुक्तिका ७, नेकपा एकीकृत समाजवादी ४, राप्रपाका १ र स्वतन्त्र १ सांसद छन् ।
