सुदूरपश्चिम प्रदेशको एक मात्र उपमहानगरपालिका रहेको धनगढीमा गठबन्धन दलहरुले संयुक्तरुपमा प्रतिबद्धता पत्र सार्वजनिक गरेका छन्। ‘हामी भ्रष्टाचार गर्ने छैनौ र गर्न पनि दिने छैनौ’ भन्ने प्रणसहित २२ बुँदे प्रतिबद्धता पत्र संयुक्त गठबन्धनका तर्फबाट सोमबार धनगढीमा सार्वजनिक गरिएको छ।

संयुक्त गठबन्धनका तर्फबाट धनगढी उपमहानगरपालिकाको मेयर र उपमेयर पदमा जितेपछि नगरबासीको सेवा, सुविधा, विकास र समृद्धिका लागि अहोरात्र खटिने प्रण गर्दै धनगढीलाई सुशासनमा अगाडि ल्याउने प्रतिबद्धता पत्रमा उल्लेख गरिएको छ।

धनगढीलाई आवश्यक पूर्वाधार तयार गरी महानगरपालिका बनाउन पहल गरिने बताउँदै संयुक्त गठबन्धनका तर्फबाट कांग्रेसमा मेयरका उम्मेदवार नृपबहादुर वडले भने, ‘उपमहानगरपालिकाको उर्मालाई नमुना बस्ती बनाइने छ।’

धनगढीको मुख्य बजार क्षेत्रका क्याम्पसरोड, चौराह र शहीद गेटमा आकाशे पुल, एक वडा एक पार्क, एक पोखरी र एक पुस्तकालय निर्माण, सुकुमबासी, मुक्त कमैया, अव्यवस्थित बसोबासीलाई वडामै गएर लालपुर्जा वितरण कार्यलाई निरन्तरता दिइने उनले बताए।

उनले भने, ‘यसअघि धनगढीका केही वडामा लालपुर्जा वितरण कार्य सुरु भइसकेको छ र, त्यसलाई निरन्तरता दिइने छ।’ एक गाउँ बहु उत्पादन नीति लिएर कृषिमा विशेष अनुदान तथा सहयोगका कार्यक्रमहरु सन्चालन गरिनुका साथै किसानका लागि कृषि बिमा कार्यक्रम ल्याइने उनले बताए।

धनगढीलाई शैक्षिक हबका रुपमा विकास गरिने बताउँदै उनले भने,‘हामीले हाम्रो प्रतिबद्धता पत्रमा निजी स्रोतका शिक्षकलाई नगर शिक्षकमा परिणत गरिसकेकाले तलब भत्ता सुविधा सरकारी शिक्षकसरह बनाउने छौँ।’

बालविकास केन्द्रका शिक्षकलाई आधारभूत तहको सेवा सुविधा उपलब्ध गराउने प्रतिबद्धता पत्रमा उल्लेख गरेको उनले बताए। उपमहानगरपालिकाभित्र निःशुल्क एम्बुलेन्स सेवा उपलब्ध गराउनुका साथै प्रत्येक वडामा स्थापना भएका नगर स्वास्थ्य केन्दैमा एक जना विशेषज्ञ डाक्टर सेवा उपलब्ध गराउने उनले बताए।

‘एक घर एक धारा’ को व्यवस्था गरिने बताउँदै उनले भने,‘खानेपानी सरसफाई तथा ढल व्यवस्थापनका लागि विशेष कार्यक्रम सञ्चालनमा ल्याइने छ।’ छाडा चौपायाका कारण किसानको बालीनाली नोक्सान हुनबाट जोगाउन यसअघि वडा नम्बर ७ र ३ मा निर्माण गरिएको गौशालालाई थप व्यवस्थित गरिने उनले बताए।

बहुजातीय, बहुसांस्कृतिक संग्रहालय निर्माण गरी सबै धर्म सम्प्रदाय र तीसँग सम्बन्धित आस्थाका केन्द्रको विकास तथा प्रवर्द्धन गरिने प्रतिबद्धता पत्रमा उल्लेख गरिएको छ। धनगढीका १५ र १६ नम्बर वडामा औद्योगिक क्षेत्र स्थापना गरिने उनले बताए। विदेशमा रहेका धनगढी बासीलाई लगानीका लागि प्रोत्साहन कार्यक्रम सञ्चालन गरिने मेयरका उम्मेदवार वडले बताए।

धनगढी उपमहानगरपालिकाबाट गठबन्धनका तर्फबाट मेयर पदमा वड र उपमेयर पदमा नेकपा ९माओवादी केन्द्र०की शान्ति अधिकारीले उम्मेदवारी दिएका छन्।