कैलाली । कैलारी गाउँपालिका–३ दक्षिण भर्रीका दिपेन्द्र चौधरी अहिले हाँसपालन व्यवसायमा व्यस्त छन्।
बिहानै हाँसको खोरमा पुगेर दाना खुवाउने र दिनभर व्यवसायको व्यवस्थापनमा लाग्ने उनको दैनिकी बनेको छ।
चौधरीले हाल खाकी जातका ८३ वटा हाँस पालेका छन्। हाँसले अण्डा दिन थालेपछि उनको आम्दानी पनि बढ्दै गएको छ।
अहिले अण्डा बिक्रीबाट मात्रै मासिक करिब २५ हजार रुपैयाँ आम्दानी हुने गरेको उनी बताउँछन्।
एउटा क्यारेट अण्डा ६ सय रुपैयाँमा बिक्री गर्दै आएको उनको भनाइ छ।
तर हाँसपालन व्यवसाय सुरु गर्नुअघि चौधरीले कुखुरापालनमा घाटा व्यहोरेका थिए। गत वर्षको पुसमा ब्रोइलर कुखुरा पालन सुरु गरेका उनले रोग तथा व्यवस्थापनको जोखिमका कारण अपेक्षित सफलता पाउन सकेनन्।
“कुखुरापालनमा मेहनत पनि धेरै लाग्ने र रोग लाग्दा थाहा पाउन गाह्रो हुने रहेछ। जोखिम देखेपछि हाँसपालन सुरु गर्ने सोच बनाएँ,” चौधरीले भने।
हाल हाँसपालनबाट राम्रो आम्दानी हुन थालेपछि उनी उत्साहित छन्।
स्थानीय बजारबाट ग्राहकहरू अण्डा किन्न उनको खोरमै पुग्ने गरेका छन्। स्थानीय बजारमा हाँसको मासुको माग कम भए पनि अण्डाको माग राम्रो रहेको उनले बताए।
आगामी दिनमा व्यवसाय विस्तार गर्दै काठमाडौंलगायत अन्य जिल्लामा समेत हाँस तथा अण्डा पठाउने उनको योजना छ।
चौधरीका अनुसार हाँसबाट वर्षभरि नै कारोबार गर्न सकिन्छ।
हाँसले अण्डा दिन छाडेपछि मासुका लागि बिक्री गर्ने गरिएको छ। हाल जिउँदो हाँस प्रतिकिलो करिब ५ सय ५० रुपैयाँमा बिक्री हुने गरेको उनले बताए।
“अहिले सुरुवाती चरण हो, विस्तारै राम्रो हुँदै गएको छ। सोचेजति लगानी गर्न सकेको छैन।
आगामी दिनमा लगानी थपेर व्यवसाय विस्तार गर्ने योजना छ,” उनले भने।
एक समय घरखर्च चलाउनसमेत समस्या हुने गरेको बताउने चौधरी अहिले आफ्नै व्यवसायबाट घरखर्च धान्न सक्ने अवस्थामा पुगेका छन्।
सानो लगानीबाट सुरु गरेको व्यवसायले आर्थिक अवस्था सुधार हुँदै गएको उनको अनुभव छ।
उनको बुझाइमा व्यवसाय ठूलो हुनका लागि सुरुमै ठूलो लगानी आवश्यक हुँदैन। मेहनत, निरन्तरता र बजारको माग बुझेर काम गर्न सके सानो व्यवसायबाट पनि राम्रो आम्दानी गर्न सकिन्छ।
“विदेश जानैपर्छ भन्ने छैन। विदेशमा जति मेहनत गर्न सकिन्छ, त्यति नै मेहनत नेपालमै गर्न सके राम्रो कमाइ गर्न सकिन्छ,” चौधरीले भने।
कुखुरापालनमा भएको घाटापछि जोखिम कम हुने विकल्प खोज्दै हाँसपालनमा लागेका चौधरी अहिले आफ्नै गाउँमा बसेर आत्मनिर्भर बन्ने प्रयासमा छन्।
