धनगढी- नेकपा माओवादी केन्द्रले सुदूरपश्चिमका मुख्यमन्त्री कमलबहादुर शाहलाई यथास्थितिमा विश्वासको मत नदिने निर्णय गरेको छ । मुख्यमन्त्री शाहले विश्वासको मत लिन भन्दा एक दिनअघि शनिबार (आज) यथास्थितिमा विश्वासको मत नदिने निर्णय गरेको हो ।
मुख्यमन्त्री शाहले आइतबार (भोलि) दिउँसो १ बजेका लागि बोलाइको प्रदेशसभाबाट विश्वासको मत लिने तयारी गरेका छन् । माओवादी केन्द्रका प्रदेश सभा सदस्य अक्कल रावलले मुख्यमन्त्री शाहलाई विश्वासको मत दिने वातावरण नबनेको बताए । माओवादी केन्द्रले सुदूरपश्चिम सरकारको नेतृत्वसहित प्याकेजमा पावर सेयरिङ हुनुपर्ने माग राख्दै आएको छ ।
प्रदेशसभामा ठूलो दलको हैसियतले कांग्रेस संसदीय दलका नेता शाहले सरकार गठन गरेका छन् । उनी मुख्यमन्त्री बनेपछि केन्द्रमा राजनीतिक समीकरण फेरिएसँगै प्रदेशसभामा सोही अनुसारको राजनीतिक समीकरण बन्ने आँकलन गरिएको थियो ।
