धनगढी- प्रधानमन्त्री कृषि आधुनिकीकरण परियोजना अन्तर्गत कैलाली जिल्लामा सञ्चालित कार्यक्रमहरुको अनुगमन गरिएको छ ।

परियोजना कार्यान्वयन इकाई कार्यालय कैलालीको अगुवाईमा कैलालीका प्रमुख जिल्ला अधिकारी युवराज कट्टेलसहित अन्तर निकाय संयुक्त अनुगमन टोलीले जिल्लामा सञ्चालित कार्यक्रमहरुको अनुगमन गरेको हो ।

टोलीले सामबार जिल्लाको कैलारी गाउँपालिका र भजनी नगरपालिका क्षेत्रमा सञ्चालित कार्यक्रमहरुको अनुगमन गर्दै देखिएका समस्याका बारेमा जानकारी लिएको छ । यो परियोजना अन्तर्गत अहिले केही ठाउँमा गुहँ खेतीमा जिरो टिलेट प्रविधि (बिना खनजोत) अपनाइएको छ भने केही किसानले चक्लाबन्दीमा गहुँ उत्पादन गरिरहेका छन् ।

टोलीले जिरो टिलेज प्रविधिमार्फत कैलारी गाउँपालिका वडा नम्बर ८ स्थित पृथ्वीपुरका किसान अजित कुमार चौधरी र बिहारी चौधरीले २२ कट्टा र सोही ठाउँका सोनुराम चौधरीले २२ कट्टामा लगाइएको गहुँ खेतीको अनुगमन गरेको छ ।

अर्का किसान सोनु चौधरीले पनि यस प्रविधिबाट गहुँ खेती राम्रो उत्पादन हुनुका साथै आफ्नो देखेर अन्य किसानहरु पनि आकर्षित भएको बताए । जिरो टिलेज मेसिन सबै ठाउँमा उपलब्ध हुनसके धेरै किसानले यही प्रविधिबाट खेती गर्नसक्ने उनको भनाइ छ ।

परम्परागत गहुँ खेतीको लागतमा लाभ उठाउने उद्देश्यसहित लागू गरिएको जिरो टिलेजबाट गहुँ खेती गर्नका लागि प्रधानमन्त्री आधुनिक कृषि परियोजनाले किसानहरुलाई बिउँ, मल, कृषि यन्त्र उपकरणलगायतका ५० प्रतिशत अनुमान दिएको छ ।

यसैगरि सोही गाउँपालिकाको वडा नम्बर ९ सिमराना स्थित हरियाली कृषि समूहले चक्लाबन्दीमा गरिएको गहुँ खेतीको पनि अनुगमन गरेको छ । ४५ विघामा गरिएको गहुँ खेतीमा ३१ जना किसान सहभागी छन् । चक्लाबन्दीमा खेती गर्दा यस वर्ष उत्पादनमा बृद्धि हुने अपेक्षा गरिएको किसान सन्तराम चौधरीले बताए । उनले मल, बिउँ, उपकरणमा अनुदान प्राप्त गरेको बताए ।

कैलारी–७ को बसन्ता स्थित गहुँबालीको जातीय प्रदर्शन कार्यक्रमको पनि अनुगमन गरियो । सो ठाउँमा प्रति तीन कट्टामा आदित्य, बोर्लग २०२०, जिंक–२, एन।एल ९७१ र वाणगंगा जातका जातीय गहुँ खेती र सोही ठाउँमा बिज वृद्धि कृषक समूहले बिउँको लागि लगाएको गहुँ खेतीको पनि अनुमगन गरिएको छ ।

साथै भजनी नगरपालिका वडा नम्बर ८ खैरीमा गरिएको चैते धानको पनि अनुगमन गरिएको छ । यसै परियोजना अन्तर्गत बिउँमा ५० प्रतिशत अनुदानमा चैते धान खेती गरिरहेको किसान धिरज विश्वकर्माले बताए । कृषि समूहलाई अनुदानमा पावर टेलर पनि प्राप्त भएको उनले बताए । भजनी क्षेत्रमा अधिकांश किसानले वर्षामा हुने डुबानका कारण चैते धान खेती गर्दै आएका छन् ।

प्रधानमन्त्री आधुनिकीकरण कृषि परियोजना अन्तर्गत किसानलाई अनुदान दिएर खेती गर्न प्रोत्साहन गरिएको परियोजना कार्यान्वयक इकाई कार्यालय कैलालीका प्रमुख गोविन्दराज जोशीले बताए । परियोजना अन्तर्गत गरिने खेती प्रविधिबारे किसानहरु विस्तारै जानकार र त्यसतर्फ आकर्र्षित भइरहेको बताए । परियोजना सकिएपछि पनि किसानहरुले नयाँ प्रविधिमार्फत खेती गरुन् भन्ने परियोजनाको उद्देश्य रहेको उनले बताए ।