काठमाडौं- सुदूरपश्चिम प्रदेश सरकारका आन्तरिक तथा कानुनमन्त्री पृथ्वीबहादुर सिंहको निधनमा प्रतिनिधि सभामा शोक प्रस्ताव पारित भएको छ। प्रतिनिधि सभामा प्रदेशका बहालवाला मन्त्रीको निधन भएपछि शोक प्रस्ताव प्रस्ताव पारित गरेर आजदेखि नयाँ अभ्यास सुरुवात भएको हो ।

प्रदेशका बहालवाला मन्त्री सिंहको निधन हुँदा प्रतिनिधि सभाका बहालवाला माननीय सरह नै सम्मान प्रकट गर्दै बुधबार संसद बैठकको सुरुमै सभामुख देवराज घिमिरेले शोक प्रस्ताव राखेका थिए।

शोक प्रस्तावमा भनिएको छ, “प्रतिनिधि सभाको यो बैठक, नेपाली काँग्रेसको तर्फबाट वि.सं. २०७९ सालमा बझाङ जिल्ला निर्वाचन क्षेत्र नं. १ (क) बाट सुदूरपश्चिम प्रदेश सभा निर्वाचनमा निर्वाचित सदस्य, लोकतान्त्रिक आन्दोलनमा नेतृत्वदायी भूमिका निर्वाह गर्नुभएका, ग्रामिण विकासमा उल्लेखनीय योगदान पुऱ्याउनु भएका, सुदुरपश्चिम प्रदेशका आन्तरिक मामिला तथा कानून मन्त्री पृथ्वीबहादुर सिंहको सवारी दुर्घटनामा परी उपचारको क्रममा २०८० असार ५ गते मंगलबार ६५ वर्षको उमेरमा असामयिक निधन भएकोमा उहाँको निधनप्रति शोक प्रकट गरी श्रद्धाञ्जली अर्पण गर्दै शोक(सन्तप्त परिवारप्रति समवेदना प्रकट गर्दछ ।”

सभामुख घिमिरेले उक्त शोक प्रस्ताव प्रस्तुत गरेर पारित भएपछि आधा घण्टाका लागि बैठक स्थगित गरेका छन्। कांग्रेसका नेता सिंह बझाङ–१ बाट प्रदेशसभामा निर्वाचित भएका थिए। मन्त्री सिंह सोमबार प्रदेश राजधानी धनगढीबाट परिवारका ४ सदस्यसहित गृह जिल्ला प्रस्थान गरेका थिए। मन्त्री सिंह चढेको जिप दिउँसो कालंगा खोला किनारको धारछडी भन्ने स्थानमा जिप दुर्घटना भएको थियो।