धनगढी- धनगढी उपमहानगरपालिका वडा नम्बर २ को वडा कार्यालय र आधारभूत स्वास्थ्य केन्द्रको भवनका लागि वडा बासीहरुसँग छलफल गरिएको छ ।
वडा नम्बर २ को वडा कार्यालयमा आज (शुक्रबार) बडाबासीहरुको भेला बोलाएर वडा कार्यालय र आधाभूत स्वास्थ्य केन्द्रको भवन कहाँ र कसरी बनाउने भन्ने सम्बन्धनमा छलफल गरिएको हो ।
वडाध्यक्ष धर्मराज ओझाको अध्यक्षतामा बसेको भेलामा सोही वडामा रहेको शैलेश्वरी आधारभूत विद्यालयलाई शारदा माविसंग समायोजन गरेर त्यहाँका भवनलाई वडा कार्यालय र आधारभूत स्वास्थ्य केन्द्रका लागि प्रयोग गर्ने कि भन्ने विकल्पमा छलफल भएको छ । सो विकल्पमाथि वडाबासीले आ–आफ्नो धारणा राखेका छन् ।
छलफलका क्रममा वडाबासीहरुले वडा कार्यालयले शैलश्वरी आधारभूत विद्यालयका शिक्षक, अभिभावकलगायतसँग पनि यस विषयमा छलफल गर्नुपर्ने सुझाव दिएका छन् ।
साथै अन्यत्र जग्गा खरिद गरेर वा ऐलानी जग्गा खोजी गरेर वडा कार्यालय र आधारभूत स्वास्थ्य चौकीका लागि संरचना बनाउने विषयमा पनि छलफल अगाडि बढेको छ ।
