धनगढी– कञ्चनपुरसंग सीमा जोडिएको नेपाल-भारतको सीमा पिलरबाट दुबैतर्फ दुई/दुई मिटर क्षेत्रमा कुनैपनि गतिविधि गर्न नपाइने सहमति भएको छ । कञ्चनपुरको दोधारा चाँदनी नगरपालिका-८ सुन्दरनगरमा भारतीय सीमा सुरक्षा बल (एसएसबी) ले खेत जोत्नमा रोक लगाएपछि उत्पन्न विवाद समाधानका लागि सोमबार अपरान्ह बसेको दुई देशका सुरक्षा अधिकारी र जनप्रतिनिधिको बैठकले यस्तो सहमति गरेका हुन् ।
उक्त विवादका विषयमा दुबै देशका सुरक्षा अधिकारीसहित जनप्रतिनिधिहरूबिच छलफल गरिएको कञ्चनपुरस्थित सशस्त्र प्रहरीको शैलेश्वरी गणका गणपति शसस्त्र प्रहरी उपरीक्षक अमर ऐरले जानकारी दिए । उनका अनुसार हाललाई सीमा पिलरदेखि दुबैतर्फ दुई/दुई मिटरसम्म कुनैपनि गतिविधि नगर्ने सहमति भएको हो ।
नेपाल–भारत सीमा क्षेत्र नजिक रहेको नेपाली भूमिमा स्थानीय इन्द्रबहादुर रोकामगरको नाममा रहेको जग्गा जोत्दै गर्दा भारतीय सीमा सुरक्षा बल एसएसबीले रोक लगाएको थियो ।
एसएसबीले खेत जोत्न नदिएपछि उनले प्रशासनसँग गुहार मागेका थिए ।
खेत जोत्न रोकेपछि नेपाल तर्फका स्थानीय नागरिकहरू र सुरक्षा अधिकारीको टोली विवाद स्थलमा पुगेको थियो । भारतीय पक्षको दादागिरी भन्दै स्थानीयहरूले विरोध समेत जनाएका थिए ।
