धनगढी- धनगढी उपमहानगरपालिका नेतृत्वको बजार अनुगमन टोलीले धनगढीका विभिन्न पाँचवटा व्यापारिक फर्मलाई जरिवाना गराएको छ । बजार अनुगमन टोलीले मंगलबार धनगढी उपमहानगरपालिकाका वडा नम्बर १५ र १६ का विभिन्न व्यापारिक फर्महरुको अनुमन गरेको हो । जसध्ये जरिवानामा पर्नेमा सबै वडा नम्बर १६ का व्यापारिक फर्महरु हुन् ।

टोलीले बेहडा बाबा एग्रो सेन्टरलाई न्युनमत एक हजार रुपैयाँ जरिवाना गराएको छ । एग्रो सेन्टर दर्ता गरेर स्टेशनरी सामान, फलफुललगायतका सामग्री राखेको र यसअघि सम्झाईबुझाई गर्दा पनि अटेर गरेको पाइएपछि उक्त फर्मलाई पहिलोपटकका लागि एक हजार जरिवाना गरिएको उपमहानगरपालिकाका उपभोक्ता हित संरक्षण शाखा प्रमुख नारायणप्रसाद शर्माले बताए ।

सोही ठाउँको बेहडा बाबा क्लिनिकलाई पनि अनुमति विना औषधि विक्रीवितरण गरेको भन्दै एक हजार रुपैयाँ जरिवाना गराइएको छ । उक्त फर्मलाई पनि दोस्रोपटकको अनुगमनका क्रममा जरिवाना गराइएको हो । उसअघिको अनुगमनमा क्रममा टोलीले औषधि विक्रीवितरणका लागि अनुमति लिन भन्दै सम्झाई बुझाई गरेको थियो ।

क्लिनिक मात्रै दर्ता गरेर औषधि विक्रीवितरण गर्न नपाइने व्यवस्था अनुसार उक्त क्लिनिकलाई जरिवाना गराएर छोडिएको र अब उपरान्त अनुमति नलिएको पाइए कानून अनुसार कारबाही गरिने उपभोक्ता हित संरक्षण शाखा प्रमुख शर्माले बताए । उनका अनुसार औषधि विक्री वितरणका लागि औषधि व्यवस्था विभागबाट अनुमतिसहित फार्मेसी पढेको जनशक्ति हुनुपर्छ ।

दक्षिण रामपुरस्थित चन्द किराना पसललाई पनि एक हजार रुपैयाँ जरिवाना गराइएको छ । पसल दर्ता नगरेको, किराना पसलका नाममा रक्सी पनि बेच्ने गरेको र म्याद गुज्रेको सामान पाइएपछि जरिवाना गरिएको अनुगमन टोलीले जनाएको छ ।

पूर्व रामपुरस्थित लक्ष्मी किराना पसल र रमेश पशुपति किराना पसललाई पनि जरिवाना गराइएको छ । यी दुवै पसलमा अनुमति बिना होटल सञ्चालन गरेर रक्सी बेच्ने गरेको पाइएपछि पहिलो पटकका लागि न्युनतम एक हजार रुपैयाँ जरिवाना गराइएको उपभोक्ता हित संरक्षण शाखा प्रमुख शर्माले बताए ।

नियम विपरीत कार्य गर्ने व्यापारिक फर्मलाई पहिलोपटकका लागि एक हजार रुपैयाँ जरिवाना गराएर सम्झाई बुझाई गरेर छोडिएको उपमहानगरपालिकाका उपभोक्ता हित संरक्षण शाखा प्रमुख शर्माले बताए । अर्कोपटक पनि सोही गल्ती भेटिए कानून अनुसार थप कारवाही गरिने उनले बताए ।

अनुगमन टोलीले विभिन्न २० वटा व्यापारिक फर्ममा अनुगमन गरेको हो । टोलीले हार्डवयर, होटल, किराना पसललगायतमा अनुगमन गरेको हो । उपमहानगरको उपभोक्ता हित संरक्षण शाखाको नेतृत्वको बजार अनुगमन टोलीमा खाद्य प्रविधि तथा गुण नियन्त्रण कार्यालय, बाणिज्य कार्यालय, पत्रकार, सुरक्षाकर्मीलगायतको सहभागिता थियो । उपमहानगरले उपभोक्ता अधिकार संरक्षण गर्ने उद्देश्यसहित बजार अनुगमनलाई तीब्रता दिएको छ ।

अनुगमनका क्रममा व्यापारिक फर्महरु दर्ता नगरेको पाइएमा दर्ताका लागि केही दिनको समय दिएर पहिलोपटक सम्झाई बुझाई गर्ने गरेको छ । दोस्रोपटकको अनुगमनमा पनि दर्ता नगरेको पाइए वा नियममाअनुसार कार्य नभए अनुगमन टोलीले जरिवाना गर्दै आएको छ ।