काठमाडौँ- इजिप्टमा कोरोना भाइरसको नयाँ भेरियन्ट इजी.५.२ भेटिएको छ । इजिप्टको स्वास्थ्य तथा जनसंख्या मन्त्रालयले हालै कोरोनाका दुईवटा केस भेटिएको पुष्टि गर्दै विज्ञप्ति जारी गरेको छ ।
मन्त्रालयका अनुसार संक्रमित दुई जनामै सामान्य लक्षण देखिएको छ । उनीहरुलाई कोभिड १९ को नयाँ भेरियन्ट पुष्टि भएसँगै अन्य नागरिकहरुलाई बुस्टर डोज लगाउन मन्त्रालयले आग्रह गरेको छ ।
श्वासप्रश्वास सम्बन्धी रोगको पहिचानको लागि देशभरका ४५० अस्पतालहरुले पठाएको रिपोर्ट जाँच गर्दा दुई जनामाथि नयाँ भेरियन्ट पुष्टि भएको हो । इजी.५.२ ओमिक्रोन भेरियन्टको अंश हो । यसको पहिलो केस फेब्रुअरिमा पुष्टि भएको थियो ।
अगस्ट ९ मा विश्वस्वास्थ्य संगठनले इजी.५.२ लाई ओमिक्रोनको अर्को प्रकारको रुपमा वर्गीकरण गरेको थियो । २०१९ को अन्त्यतिर चीनबाट सुरु भएको कोरोना भाइरसले विभिन्न रुपमा समग्र विश्वलाई नै आक्रान्त पारेको थियो ।
