धनगढी- दुई जना फरार प्रतिवादी पक्राउ परेका छन् । चोरी मुद्धा र चेक अनादर मुद्धाका प्रतिवादी पक्राउ परेका हुन् ।
जिल्ला अदालत कैलालीको फैसलाले चोरी मुद्दामा रु.५० हजार जरिवाना ठहर भई फरार रहेका बर्दगोरिया गाउँपालिका–४ का २६ वर्षीय रमेश चौधरीलाई सोमबार पक्राउ गरिएको सुदूरपश्चिम प्रदेश प्रहरी कार्यालय धनगढीले जानकारी दिएको छ । उनलाई इलाका प्रहरी कार्यालय सडकपुर बौनियाबाट खटिएको प्रहरी टोलीले उनकै घर ठेगानाबाट पक्राउ गरिएको जनाइएको छ ।
त्यस्तै, जिल्ला अदालत कञ्चनपुरको २०८१ वैशाख २३ गतेको फैसलाले चेक अनादर मुद्दामा ६ महिना कैद सजाय र दुई हजार जरिवाना ठहर भई फरार रहेका गोदावरी नगरपािलका–२ घरभइ हाल बाँकेको कोहलपुर नगरपालिका–११ बस्ने भोजप्रसाद चापागाईलाई पक्राउ गरिएको प्रहरीले जनाएको छ । चापागाईलाई इलाका प्रहरी कार्यालय कोहलपुरले पक्राउ गरी आवश्यक कारवाहीको लागि सोमबार जिल्ला प्रहरी कार्यालय कञ्चनपुरमा बुझाएको सुदूरपश्चिम प्रदेश प्रहरी कार्यालयले जनाएको छ ।
