धनगढी- बाजुराको खप्तड छेडेदहबाट उद्वार गरेर कञ्चनपुरको गुलरियास्थित कृष्णप्रणामी सेवाधाम अनाथ आश्रममा राखिएकी जलुदेवीको स्वास्थ्यमा थप समस्या देखिएपछि उपचार थालिएको छ ।
जिउ दुख्ने र हात खुट्टा चलाउन थप समस्या देखिएपछि जलुदेवीलाई उपचारका धनगढीस्थित सेती प्रादेशिक अस्पतालमा उपचार सुरू गरिएको अनाथ आश्रमका अध्यक्ष शेरबहादुर रोकायाले बताए । हात खुट्टा र छाती दुख्यो भनेर रातभर रुन थालेपछि जलुदेवीलाई सोमबार विहानै अस्पताल ल्याइएको रोकायाले बताए । उनका अनुसार जलुदेवीको शरीर सुनिएको छ भने हिडडुल गर्नथप समस्या भएको छ ।
चिकित्सकका अनुसार उनको छाती, हाडजोर्नीमा समस्या देखिएको छ भने मानसिक अवस्थाको पनि चेकजाँच गर्नुपर्ने छ ।
बाजुराको खप्तड छेडेदह\ गाउँपालिका–१ की ५२ वर्षीय जलुदेवी बुढालाई संरक्षणका लागि केही दिनअघि अनाथ आश्रममा ल्याइएको थियो । उनीसंगै उनका दुई सन्तानलाई पनि आश्रममा राखिएको छ । आमा-छोरालाई खप्तड छेडेदह गाउँपालिका वडा नम्बर १ वडाध्यक्ष बीरबहादुर रावलले आश्रममा पुर्याएका हुन् ।
जलुदेवी दुई छोरासहित गाउँपालिकाको वडा नम्बर १ लुगेनाको ओडारमा बस्दै आएकी थिइन् । प्रहरीको सहायतले वडाध्यक्ष रावलको पहलमा गत शुक्रबार जलुदेवीलाई उद्दार गरिएको थियो ।
