काठमाडौं- विप्लव नेतृत्वको नेकपाका नेताहरुले ठूलो बलिदान र त्यागबाट आएको परिवर्तनलाई उल्ट्याउने षड्यन्त्रसहित भएको काँग्रेस–एमालेको गठबन्धनविरुद्ध सबै माओवादीले एक भएर मुकाविला गर्ने उद्घोष गरेका छन् । संविधान संशोधन गरेर समानुपातिक र समावेसीलगायतका उपलब्धिको रक्षाका लागि जस्तोसुकै संघर्षमा पनि जाने नेताहरुले चतावनीसमेत दिएका छन् ।

मंगलबार राजधानीको संवाद डबलीमा ‘सहिद निरकुमार राईको छैटौं स्मृति दिवस’ कार्यक्रममा नेकपाका पोलिटब्यूरो सदस्य माईला लामाले निरकुमार राई जस्तै हजारौंको बलिदानबाट आएको परिवर्तनलाई संस्थागत गर्नुको सट्टा त्यसलाई उल्ट्याउने चलखेल सुरु भएको आरोप लगाएका छन् । नेकपा (माओवादी केन्द्र) तिर इङ्गित गर्दै माओवादीको एक हिस्सा संसदीय राजनीतिमा रमाएको तर आफूहरु क्रान्तिलाई निरन्तरताका लागि अगाडि बढेको बताउँदै भने, “जनताले चाहेको र सहिदले देखेको सपनालाई बीच बाटोमै अलपत्र छाड्न सकिएन र एकीकृत जनक्रान्तिको रोडम्याप बनाएर लड्यौं, अब यसलाई थप मजबुद बनाएर लड्ने हो ।” लामाले दलाल पूँजीवादी व्यवस्थाको कारण हजारौं यूवाहरु पलायन हुन बाध्य भएको र देशलाई थप कमजोर बनाउन देउवा–ओलीको गठबन्धन भएको बताए ।

लामाले २०४७ सालतिर नेपालको राजनीति फर्काउन खोजिए त्यसविरुद्ध माओवादीहरु एक भएर लड्ने चेतावनी दिँदै भने, “अहिले क्रान्तिकारी कमजोर भएको अवस्थामा प्रतिगामी शक्तिहरुले २०४७ तिर फार्काउने कुचेस्टा गरिरहेका छन् सबै माओवादी एक बनेर लडौं ।”

कार्यक्रममा वरिष्ठ अधिवक्ता एकराज भण्डारीले अस्थिरताको गोलचक्करमा फसाएर देशलाई असफल र कंगाल बनउने मुख्य दोषी संसदीय व्यवस्था भएको र त्यसको विकल्प खोज्नुपर्ने धारणा राखे । क्रान्तिबाट आएको माओवादी शक्ति पनि संसदीय भाषमा फेसको कारण उपलब्धिको रक्षा नभएको जिकिर गर्दै भण्डारीले भने, “यो व्यवस्थामा प्रचण्ड, केपी या देउवा जो आएपनि सबै दूध चोर बिराला जस्तै हुन्, त्यसैले अब यो व्यवस्थाको विकल्प खोजौं ।” भण्डारीले काँग्रेस–एमालेको संविधान संशोधनको मुद्दाले माओवादी र उत्पीडित जनतालाई झस्काएको र प्रतिगमनतिर र्फकन लागेको बताउँदै सबै परिवर्तनमकारी शक्ति एक ठाउँमा आउनु पर्ने बताए ।

भण्डारीले सत्य निरुपण तथा मेलमिलाप आयोग र वेपत्ता योद्धा छानविन समितिलाई अलपत्र पारेर शान्तिप्रक्रियालाई तार्किक निस्कर्षमा पुर्यान चुक्नु दूर्भाग्य भएको बताए । “अब निरकुमार राई तथा हजारौं सहिद तथा वेत्ताहरुको न्याय र जनताको हितका निम्ति सबै माओवादी र परिवर्तनकारी शक्तिहरु एक ठाउँमा आउनुको विकल्प छैन” भण्डारीले भने ।
सो पार्टीका काठमाडौं जिल्ला सेक्रेटरी चिरञ्जीवी ढकालले सहिद निरकुमार राईले देखेको सपना र परिवर्तनको सोचलाई हरेक क्रान्तिकारीहरुले आत्मसाथ गर्नुपर्ने धारणा राख्दै भने, “कमरेड निरकुमार सहिद हुन तयार हुनुभयो तर तानाशाही सत्ता सामु झुक्नु भएन, जो हाम्रो आदर्श हो ।”

जनपत्रकार संगठनका अध्यक्ष शेरबहादुर विश्वकर्माले देश संसदीय व्यवस्थाको दलदलले क्रान्तिकारीहरुलाई जकड्याएको अवस्थामा सबैले त्यसबाट निस्कने प्रयास गर्नु पर्नेमा जोड दिए ।

सो कार्यक्रममा राजनीतिक विश्लेशक नरेन्द्रजंग पीटर, सहिद निरकुमारकी जीवन संगीनी इन्द्रकला राई,घाइते सुरेन्द्र महर्जन,सहिद कुमार पौडेलकी दिदी, सहिद निरन्तरकी जीवन संगीनी पूर्णिमा, सहिद प्रज्ज्वल शाहीकी बहिनी मनिषालगायतको उपस्थिति रहेको थियो ।

कार्यक्रमको अध्यक्षता काठमाडौं जिल्ला सेक्रेटरी चिरन्जीवी ढकालले गरेका थिए भने सञ्चालन अखिल नेपाल जनसांस्कृतिक महासंघका महासचिव कुशल बोगटीले गरेका थिए ।

नेकपाका तत्कालिन भोजपुर जिल्ला इन्चार्ज निरकुमार राइको २०७६ असार ६ गते  हत्या भएको थियो ।