धनगढी- उपमहानगरपालिकाले मुख्य सडकको स्तरोन्नति गरेर चौडाई बढाउने भएपछि व्यापारीले उपमहानगरपालिकालाई सहयोग गर्न थालेका छन् । केहीदिन अघि मात्रै उपमहानगरपालिकाले एक सूचना जारी गर्दै असोज मसान्त भित्र सडकको क्षेत्राधिकार भित्र रहेका संरचना हटाउन आह्वान गरेको छ । उपमहानगरपालिकाले सूचना जारी गरेसंगै व्यापारीहरुले उपमहानगरपालिकालाई सहयोग गर्न थालेका छन् । सडक क्षेत्रभित्र रहेका संरचनालाई केही व्यापारीले आफै भत्काउन पनि सुरु गरेका छन् ।
चौलानी ग्रुपका सञ्चालक मानसिंह साउँदले मुख्य सडक विस्तार गर्न संरचना भत्काएर सहयोग गर्न तयार रहेको बताएका छन् । विकासका लागि त्याग गर्न तयार रहेको भन्दै उनले सडक क्षेत्रमा पर्ने संरचना आफैं भत्काउने बताएका छन् । उपमहानगरको नापी टोलीले लगाएको चिन्ह भित्रको संरचना हटाउँदा सहर सुन्दर बन्छ भने विकासको बाधक आफूं नहुने उनको भनाई छ । ‘केही वर्ष अगाडि मात्रै निर्माण सम्पन्न भएको संरचना फेरि भत्काउँदा मर्का त पर्छ नै,’ उनले भने, ‘तर विकासको बाधक नभएर त्याग गर्दा सबैलाई राम्रै हुन्छ । सडक क्षेत्रभित्र पर्ने संरचना हटाउन तयार छु ।’
यस्तै धनगढीका व्यवसायी सञ्जय चौधरीले पनि धनगढीको मुख्य सडक विस्तार गर्न उपमहानगरपालिकालाई सहयोग गर्ने बताए । उनले विहीबार धनगढी उपमहानगरपालिकालाई सडकको क्षेत्राधिकार छुट्याउन लगाएर भौतिक संरचना आफै खाली गर्ने बताए । सुन्दर, समृद्ध र विकसित सहरका लागि लाखौं लगानी गरेर भर्खरै निर्माण गरेको भवन भत्काउन तयार रहेको उनले घोषणा गरे । ‘नयाँ बनाउँदा पूरानो संरचना भत्किनु स्वभाविक हो,’ उनले भने, ‘यो काममा हामीले उपमहानगरपालिकालाई सहयोग गर्नुपर्छ ।’
धनगढीका अर्का व्यवसायी हेमन्तकान्त चुवाईले उपमहानगरपालिकाले चालेको कदम सराहनीय रहेको बताए । विकास निर्माणका लागि आफू कुनै बाधक नरहेको र उपमहानगरपालिकालाई साथ र सहयोग गर्न तयार रहेको उनले बताए ।
धनगढी उपमहानगरपालिकाले कैलाली पुलदेखि क्याम्पस चोकसम्म करिव २ हजार ७ सय मिटर सडकलाई ३० मिटर बनाउन डिपिआर तयारको चरणमा रहेको छ । उपमहानगरको मुख्य सडकलाई चौडा बनाउने योजना रहेको छ ।
तस्बीरः जितेन्द्र रावल
