धनगढी- नेपाल विद्युत् प्राधिकरण धनगढी वितरण केन्द्रको सडकबत्तीको बक्यौता रु ११ करोड ३४ लाख १८ हजार तीन सय ८३ पुगेको छ । गत आव २०८०/८१ को असार मसान्तसम्ममा सडकबत्तीको उक्त बक्यौता रकम पुगेको हो ।
अघिल्लो आर्थिक वर्ष २०७९/८० को तुलनामा गत आवमा सडकबत्तीको बक्यौता रकम बढेको वितरण केन्द्रले जनाएको छ । अघिल्लो आव २०७९/८० को तुलनामा गत आवमा ८३ लाख ८५ हजारले बढेको वितरण केन्द्रका लेखा प्रमुख विनोद ढकालले जानकारी दिए ।
उनका अनुसार अघिल्लो आवमा सडकबत्तीको बक्यौता रु १० करोड ५० लाख ३३ हजार तीन सय ७३ रहेको थियो । वितरण केन्द्रको पाँचवटा पालिका धनगढी उपमहानगरपालिका,गोदावरी,गौरीगंगा नगरपालिका,चुरे र कैलारी गाउँपालिका कार्यक्षेत्र रहेको जनाइएको छ ।
‘अन्य पालिकाको त बक्यौता नगण्य नै छ, धनगढीको अली बढी छ’, उनले भने ‘बक्यौता असुलीका लागि कार्यालयले पालिकाहरुलाई पत्राचार गरेको छ ।’
गत आवमा वितरण केन्द्रको औद्योगिक, घरायसी तथा अन्य ग्राहक र सडकबत्तीको गरि २१ करोड ७३ लाख ७९ हजार बक्याैता पुगकाे ढकालले बताए । अघिल्लो आवमा २०७९/८० मा वितरण केन्द्रको बक्यौता रकम रु २० करोड १३ लाख २७ हजार थियो । गत आवमा बक्यौता रकम बढेको छ ।
ढकालका अनुसार गत आवमा औद्योगिक ग्राहकको बक्यौता रकम रु दुई करोड ७८ लाख सात हजार तीन सय ७२, घरायसी ग्राहकको रु चार करोड ४४ लाख ७६ हजार चार सय ७६, सडकबत्तीको रु ११ करोड ३४ लाख १८ हजार तीन सय ८३ र अन्य ग्राहक रु तीन करोड १६ लाख ७६ हजार आठ सय तीन पुगेको छ ।
गत आवमा महसुल नतिर्ने एक हजार नौ सय ६२ ग्राहकको लाइन काटिएको लेखा प्रमुख ढकालले जानकारी दिए । वितरण केन्द्रका अनुसार नियमित महसुल भुक्तानी गर्ने ग्राहक ६५ दशमलव दुई प्रतिशत छन् ।
