धनगढी । कैलालीमा स्थायी बन्ध्याकरण गर्नेमा पुरुषभन्दा महिलाको सङ्ख्या बढी रहेको छ ।
स्वास्थ्य कार्यालय कैलालीले चालु आर्थिक वर्ष २०८१÷०८२ मा जिल्लाका विभिन्न स्थानमा सञ्चालन गरेको निःशुल्क स्थायी बन्ध्याकरण शिविरमा पुरुषभन्दा महिलाको सहभागिता बढी रहेको हो ।
जिल्लाका विभिन्न ११ स्थानमा सञ्चालन गरिएको शिविरमा सन्तानको रहर पुगेका दुई सय २१ जनाले स्थायी बन्ध्याकरण सेवा लिएका स्वास्थ्य कार्यालय कैलालीका परिवार नियोजन अधिकृत ओलटनारायण चापागाईँले जानकारी दिए ।
उनका अनुसार शिविरमा दुई सय दुई महिला र १९ जना पुरुषले स्थायी बन्ध्याकरण सेवा लिएका छन् । सुनौलो परिवार नेपालको सहकार्यमा गत मंसिर ५ गतेदेखि २५ गतेसम्म जिल्लाका विभिन्न ११ स्थानमा स्थायी बन्ध्याकरण शिविर आयोजना गरिएको उनले बताए । परिवार नियोजनको स्थायी बन्ध्याकरण मिनिल्याप महिला र भ्यासेक्टोमी पुरुषले गर्ने गरेका छन् ।
स्वास्थ्य कार्यालयले गत आर्थिक वर्ष २०८०÷८१ मा जिल्लाका विभिन्न स्थानमा सञ्चालन गरेको शिविरमा दुई सय ४६ जनाले स्थायी बन्ध्याकरण सेवा लिएका परिवार नियोजन अधिकृत चापागाईँले जानकारी दिए । जसमा दुई सय २० महिला र २६ जना पुरुषले स्थायी बन्ध्याकरण सेवा लिएका छन् । गत आवमा पनि स्थायी बन्ध्याकरण सेवा लिनेमा पुरुषभन्दा महिलाको सङ्ख्या बढी रहेको थियो ।
“स्थायी बन्ध्याकरण गर्ने पुरुषभन्दा महिला बढी छन्”, परिवार नियोजन अधिकृत चापागाईँले भने,–“पुरुषले भ्यासेक्टोमी गर्दा शरीरमा अप्ठ्यारो हुन्छ भन्ने भ्रम पनि छ । महिलाहरुले नै पुरुषलाई बन्ध्याकरण गर्न नदिने जस्ता कारणले स्थायी बन्ध्याकरणमा पुरुषभन्दा महिलाको सहभागिता बढी भएको देखिन्छ ।”
