धनगढी- अविरल वर्षाले डुबानमा परेको कैलालीको कैलारी गाउँपालिकाले सहयोगको लागि सार्वजनिक अपील जारी गरेको छ । बाढी पीडितहरूको पुनःस्थापना, राहतको लागि सो गाउँपालिकाले आइतबार सार्वजनिक अपील जारी गरेको हो । गाउँपालिका अध्यक्ष राजसमझ चौधरीले हजारौं गाउँपालिका बासीको बाढीले खाद्यान्न, लत्ताकपडा, पशु चौपाया नष्ट भएको बताए ।
गाउँपालिकाको सीमित स्रोत साधनमार्फत सहयोगको कार्य जारी रहे पनि प्रभावकारी राहत तथा पुनःस्थापनाको लागि सबै सरोकारवाला निकायसमक्ष सहयोगको लागि अपिल गरेका हुन् । अपीलमा भनिएको छ, ‘गाउँपालिकाको अधिकांश भाग डुबान र कटान गरि धान बाली नष्ट हुनुको साथै व्यापक मात्रामा धनमालको नोक्सानी भएकोले यो विपदको बेला बाढी पीडितको पुनःस्थापना र राहत सहयोगका लागि अपील गर्दछु ।’
उनले आवश्यक राहत सहयोग तथा समन्वयको लागि सरकारी निकाय, वित्तीय संस्था, गैरसरकारी संघरसंस्था नागरिक समाज, उद्योगी व्यापारी तथा आमनागरिकलाई अपिल गरेका हुन् । कैलारी गाउँपालिकाका अनुसार बाढीले करिब ९ सय घरधुरी डुबानमा परेको छ भने करिब ५ हजार मानिस प्रभावित भएका छन् । गाउँपालिकाको वडा नं. ५ मा ३ सय, वडा नंं. ८ मा २५०, वडा नं. १ मा ४०, वडा नं. ७ मा ३१० घरधुरी डुबानमा परेको हो ।
गाउँपालिकाको वडा नम्बर ५ स्थित मनकापुर, बन्दरगौरी, बैजपुर, सपना शिविरसहित वडा नम्बर ७ स्थित बर्का वसन्ता, छटकपुर वसन्ता, रामपुर, नारायणपुर, टिघरी लगायतका बस्ती डुबानमा परेका छन् ।
