कैलाली । चार महिना देखिको बन्दले दूग्ध वितरण आयोजना अत्तरियाले ठूलो घाटा बेहोरेको छ । जेठ ८ गते देखि स्थानीयको बन्दका कारण आयोजनाले आर्थिक तथा उत्पादनका काम गर्न नसक्दा घाटा बेहोरेको हो ।
धनगढी उपमहानगरपलिका–१५ कनरीमा धनगढी दूग्ध वितरण आयोजना स्थानान्तरणा हुन थालेको भन्दै गोदावरी नगरपालिकाका स्थानीयले ताला लगाएका थियो । धनगढी उपमहानगरपालिकाले २५ बर्षका लागि धनगढी–१५ मा जडिबुटी प्रशोधन केन्द्रका लागि बनाएको भवन तथा जग्गा उपलब्ध गराउने भनी २०८१ माघमा दूग्ध विकास संस्थान केन्द्रीय कार्यालयसंग सम्झौता गरेको धनगढी दूग्ध वितरण आयोजनाका आयोजना प्रमुख निरन्जन भट्टराईले निशाना न्युजलाई जानकारी दिए ।
गोदावरीबाट आयोजना धनगढी जान लागेको भन्दै स्थानीयले तालाबन्दी गरेका थिए । ४ महिना देखिको बन्द मंगलबार खुलेको छ । गोदावरीमा नै संचालनमा ल्याउने भनेपछि मंगलबार आयोजनाको ताला खुलेको उनले बताए ।
उनले भने ‘त्यो बीचमा धेरै क्षति भयो । आर्थिक वर्ष २०८१ देखि २०८२ को भदौ मसान्तसम्मको करिब ६ करोड रुपैयाँ कृषकलाई भुक्तानी दिन बाँकी छ । कृषकबाट दूध संकलन हुन पाएन आर्थिक गतिविधि पुरै बन्द भयो ।’ जस्ले कृषकको करोडौँको दूध खेर गएको उनले बताए । कार्यालय संचालनमा आएको र कृषकको बाँकी केही रकम ,दसैंसम्ममा भुक्तानी गरिने उनले बताए ।
दसैँसम्ममा ३ करोड रुपैयाँ भुक्तानी गरिने र बाँकी रकम क्रमशः भुक्तानी हुँदै जाने उनले बताए । नौनी र धुलो दूध मौज्दात रहनाले पनि केही समस्या भएको उनले बताए । उनले भने ‘ठाउँ पनि सानो छ । अर्को समस्या के हो भने आयोजनाको आफ्नो जग्गा छैन भाडामा छ । जस्का कारण काम गर्न समस्या हुँदै आएको छ ।’