धनगढी । कैलाली भन्सार कार्यालय धनगढीले वार्षिक लक्ष्यको १८.४६ प्रतिशत राजस्व संकलन गरेको छ । कार्यालयले चालु आव २०८२/८३ को साउनदेखि असोजसम्ममा वार्षिक लक्ष्यको १८.४६ प्रतिशत राजस्व संकलन गरेको हो ।

कार्यालयको चालु आवमा ९ अर्ब ७१ करोड १५ लाख राजस्व संकलन गर्ने लक्ष्य रहेकामा ३ महिनामा १ अर्ब ७९ करोड २८ लाख राजस्व संकलन भएको कार्यालयका सूचना अधिकारी खिमप्रसाद अर्यालले जानकारी दिए ।

चालु आवका कुनै पनि महिनामा राजस्व संकलन लक्ष्यमा पुग्न नसकेको उनले जानकारी दिए । साउन महिनामा ७१ करोड ६१ लाख राजस्व संकलनको लक्ष्य रहेकामा ५७ करोड ८० लाख अर्थात ८०.७२ प्रतिशत र भदौ महिनामा ७४ करोड २१ लाख राजस्व संकलनको लक्ष्य रहेकामा ५३ करोड ७० लाख अर्थात ७२.३६ प्रतिशतमात्रै राजस्व संकलन भएको उनले जानकारी दिए ।

असोज महिनामा पनि राजस्व संकलन लक्ष्यमा पुग्न सकेको छैन् । सूचना अधिकारी अर्यालका अनुसार असोजमा ७६ करोड ७७ लाख राजस्व संकलनको लक्ष्य रहेकामा ६७ करोड ७८ लाख अर्थात ८८.२९ प्रतिशत मात्रै राजस्व संकलन भएको छ ।

निर्यात न्युन हुने कैलाली भन्सार कार्यालयले पछिल्ला केही वर्षयता लक्ष्य अनुसारको राजस्व संकलन गर्न सकिरहेको छैन् ।
गत आव २०८१/८२ मा पनि राजस्व संकलन लक्ष्यमा पुग्न सकेको थिएन् । गत आवमा ११ अर्ब १६ करोड २६ लाख राजस्व संकलनको लक्ष्य रहेकामा ८ अर्ब ६६ करोड ९८ लाखमात्रै राजस्व सङ्कलन भएको भन्सार कार्यालयको तथ्यांक छ । जुन वार्षिक लक्ष्यको ७७.६७ प्रतिशतमात्रै रहेका थियो ।

गत भदौ २४ गते भएको जेनजी आन्दोलनका क्रममा भन्सार कार्यालयमा भएको आगजनी तथा तोडफोडले ठूलो क्षति भएको छ । हाल समस्याका बावजुद कार्यालयका कामकारबाही भइरहेको भन्सार कार्यालयले जनाएको छ ।