धनगढी । कैलालीमा गत वर्षको तुलनामा यस वर्ष आलु उत्पादनमा वृद्धि भएको छ । गत वर्षको तुलनामा यस वर्ष आलुखेतीको क्षेत्रफल बढेसँगै उत्पादन पनि बढेको हो ।

जिल्लास्थित कृषि ज्ञान केन्द्रका सूचना अधिकारी टेकबहादुर बिष्टका अनुसार गत वर्ष जिल्लामा पाँच हजार आठ सय हेक्टर क्षेत्रफलमा आलुखेती गरिएकामा ८१ हजार दुई सय मेट्रिक टन आलु उत्पादन भएको थियो ।

यस वर्ष छ हजार दुई सय हेक्टर क्षेत्रफलमा आलुखेती गरिएकामा ८९ हजार नौ सय मेट्रिक टन आलु उत्पादन भएको उनले जानकारी दिए ।
गत वर्षको तुलनामा यस वर्ष आठ हजार सात सय मेट्रिक टन बढी आलु उत्पादन भएको तथा चार सय हेक्टर क्षेत्रफल वृद्धि भएको उनले जानकारी दिए ।

उनले भने,‘यस वर्ष क्षेत्रफल पनि बढेको छ । क्षेत्रफल बढेपछि उत्पादन पनि बढ्ने नै भयो । मौसम पनि अनुकुल हुनुपर्छ । त्यसले पनि उत्पादन वृद्धि भएको हो ।’

‘यहाँका किसानले धेरैजसो कार्डिनल,डेजिरेलगायतका आलु लगाउने गरेका छन्’,उनले भने ‘त्यसको उत्पादकत्व बढी हुन्छ । जसले गर्दा उत्पादन वृद्धि भएको देखिन्छ ।’

किसानलाई व्यावसायिक आलुखेतीमा प्रेरित गर्न,किसानको उत्पादन बढाउन, किसानको मागअनुसार ज्ञान केन्द्रले बीउ, विषादी तथा उत्पादन सामग्री ५० प्रतिशत अनुदानमा उपलब्ध गराउँदै आएको सूचना अधिकारी बिष्टको भनाइ छ ।