धनगढी । नेपाली कांग्रेसले सुदूरपश्चिम प्रदेशस्तरीय भेला धनगढीमा आयोजना गर्ने भएको छ। विशेष महाधिवेशनपछि कांग्रेसले प्रदेश तथा स्थानीय तह केन्द्रित भेला गर्न लागेको हो। भेला शनिबार र आइतबार सञ्चालन हुनेछ।
शुक्रबार धनगढीमा आयोजित पत्रकार सम्मेलनमा पार्टीले भेलाको तयारी अन्तिम चरणमा पुगेको जनाएको छ। भेलालाई कांग्रेसका सभापति गगनकुमार थापा लगायत केन्द्रीय नेताहरूले सम्बोधन गर्ने कार्यक्रम रहेको छ।
पत्रकार सम्मेलनमा बोल्दै कांग्रेसका सहमहामन्त्री प्रकाश रसाइली स्नेहीले प्रदेशस्तरीय प्रशिक्षण भेलामा २१ फागुनमा सम्पन्न प्रतिनिधि सभा निर्वाचनको विस्तृत समीक्षा गरिने बताए। साथै स्थानीय तहमा निर्वाचित जनप्रतिनिधिहरूको कार्यसम्पादनबारे पनि छलफल हुने जानकारी दिए।
उनका अनुसार भेलामा पार्टीका उपसभापति विश्वप्रकाश शर्मा सहभागी भइसकेका छन् भने सभापति थापा शनिबार बिहान धनगढी पुग्ने कार्यक्रम छ। विशेष महाधिवेशनपछि कांग्रेसका निवर्तमान सभापति शेरबहादुर देउवा को गृहप्रदेश सुदूरपश्चिममा हुन लागेको पहिलो समीक्षा भेलाका रूपमा यस कार्यक्रमलाई चासोका साथ हेरिएको छ।
यसअघि प्रतिनिधि सभा निर्वाचनका क्रममा सभापति थापासहितका नेताहरूले सुदूरपश्चिममा चुनावी सभा गर्न प्रयास गरे पनि आन्तरिक समन्वय अभावका कारण कार्यक्रम हुन नसकेको बताइन्छ।
