धनगढी । सुदूरपश्चिम प्रदेशमा नेपाली कांग्रेसले मन्त्री हेरफेरको अन्तिम तयारी गरिरहेको छ। असन्तुष्ट पक्षसँगको वार्ताअनुसार आज दुवै पक्षले नयाँ मन्त्री तथा राज्यमन्त्रीहरूको छनोट गरिरहेका छन्। मुख्यमन्त्री कमलबहादुर शाह पक्ष र देवानसिंह विष्ट पक्षले आ–आफ्ना तर्फबाट मन्त्रीहरूको नाम तय गरिरहेको बुझिएको छ।

यसैबीच, सत्ता साझेदार नेकपा एमालेभित्र पनि मन्त्री फेर्नुपर्ने दबाब बढेको छ। एमालेबाट हाल तीन मन्त्री (सुरेन्द्र पाल, वीरबहादुर थापा, हिरा सार्की) र एक राज्यमन्त्री (निर्मला साउद) छन्। झण्डै दुई वर्ष मन्त्री भएका उनीहरूलाई फेरेर अन्य सांसदहरूलाई अवसर दिनुपर्ने भन्दै एमाले सांसदहरूले दबाब दिइरहेका छन्।

केही समयअघि एमाले अध्यक्ष केपी शर्मा ओलीसँगको भेटमा पनि यो विषय उठेको थियो। अहिले कांग्रेसले मन्त्री हेरफेर गर्दै गरेको बेला एमाले नेताहरूले पनि आफ्नो तर्फबाट हेरफेर गर्नुपर्ने मागलाई तीव्र बनाएका छन्। भोलि सरकार विस्तार हुन सक्ने तयारीका बीच एमालेको दबाबले प्रदेश राजनीति थप रोचक बनेको छ।