धनगढी । सुदूरपश्चिम प्रदेशका मुख्यमन्त्री खगराज भट्टले एकीकृत बजेट निर्माणमार्फत प्रदेशको पर्यटन क्षेत्रको दिगो विकास हासिल गर्न सकिने बताएका छ्न ।
आगामी बजेटमा सुदूरपश्चिमका पर्यटकीय क्षेत्रको विकास र प्रवर्द्धन कसरी गर्ने भन्ने विषयमा नाटा सुदूरपश्चिम तथा पर्यटन व्यवसायीहरूसँग आयोजित छलफल कार्यक्रममा बोल्दै मुख्यमन्त्री भट्टले संघ, प्रदेश र स्थानीय तहले आ–आफ्नै ढंगले टुक्रे योजना निर्माण गर्नुभन्दा उपलब्ध बजेटलाई एकीकृत गरी नयाँ ढंगबाट विकासको खाका तयार गर्नुपर्ने बताए ।
उनले सुदूरपश्चिममा भारतीय पर्यटकलाई आकर्षित गर्न पर्याप्त सम्भावना रहेको उल्लेख गर्दै धार्मिक तथा पर्यटकीय क्षेत्रको विकास र प्रवर्द्धनमा विशेष ध्यान दिनुपर्ने बताउनुभयो।
मुख्यमन्त्री भट्टले प्रदेश सरकारले धार्मिक पर्यटनलाई प्राथमिकतामा राख्दै पर्यटकीय क्षेत्रको पूर्वाधार विकास, प्रवर्द्धन र प्रचारप्रसारलाई प्रभावकारी बनाउन आवश्यक पहल गर्ने बताए ।
सुदूरपश्चिममा रहेका धार्मिक, सांस्कृतिक तथा प्राकृतिक पर्यटकीय क्षेत्रको व्यवस्थित विकास गर्न संघ, प्रदेश, स्थानीय तह र निजी क्षेत्रबीच सहकार्य आवश्यक रहेको उनको भनाइ थियो।
छलफलमा पर्यटन व्यवसायीहरूले आगामी बजेटमा पर्यटन क्षेत्रलाई प्राथमिकता दिँदै पर्यटकीय पूर्वाधार विकास, प्रचारप्रसार तथा व्यवसायीमैत्री नीति निर्माण गर्न मुख्यमन्त्रीको ध्यानाकर्षण गराएका थिए।
