धनगढी । भोटेकोशी क्षेत्रमा आएको विनाशकारी बाढीबाट प्रभावित परिवारको राहत तथा पुनःस्थापनाका लागि धनगढी नगर प्याब्सनले २८ लाख ६१ हजार १० रुपैयाँ आर्थिक सहयोग गर्न जिल्ला प्याब्सन कैलालीलाई हस्तान्तरण गरेको छ ।
धनगढी नगर प्याब्सनले सञ्चालन गरेको राहत संकलन अभियानमा प्याब्सनअन्तर्गतका सदस्य विद्यालयका सञ्चालक, विद्यालय व्यवस्थापन, प्रधानाध्यापक, शिक्षक, कर्मचारी र विद्यार्थीबाट उक्त रकम संकलन गरी हस्तान्तरण गरेको हो ।
संकलित रकम ‘प्रधानमन्त्री दैवी प्रकोप राहत कोष’मा जम्मा गर्ने गरी प्याब्सन कैलाली जिल्ला कमिटी कैलालीका वरिष्ठ उपाध्यक्ष छत्रराज पण्डितमार्फत जिल्ला कार्यसमितिको समन्वयमा प्रधानमन्त्री राहत कोषमा दाखिला गरिने छ ।
बाढीका कारण ठूलो जनधनको क्षति भएपछि पीडित परिवारलाई राहत उपलब्ध गराउने उद्देश्यले आर्थिक सहयोग संकलन अभियान सञ्चालन गरिएको प्याब्सनका नगर अध्यक्ष ध्रुवबहादुर सिंहले बताए ।
प्राकृतिक विपद्को समयमा पीडितलाई सहयोग गर्नु सामाजिक उत्तरदायित्व भएकाले विद्यालय परिवारलाई अभियानमा सहभागी गराइएको उनले बताए ।
राहत अभियानमा सहभागी भई सहयोग गर्ने सदस्य विद्यालय, सञ्चालक, प्रधानाध्यापक, शिक्षक, कर्मचारी तथा विद्यार्थीलाई प्याब्सनले धन्यवाद दिएको छ ।
प्याब्सनले बाढीपीडितको उद्धार, राहत र पुनःस्थापनाको कामलाई थप प्रभावकारी बनाउन सम्बन्धित सरकारी निकाय तथा सरोकारवालासँग आग्रहसमेत गरेको छ ।
धनगढी नगर प्याब्सनले आगामी दिनमा पनि सामाजिक तथा मानवीय सेवाका कार्यमा आफ्नो क्षमता र सामथ्र्यअनुसार निरन्तर सहकार्य गर्नुपर्ने प्याब्सनका केन्द्रीय उपाध्यक्ष ललितराज पन्तले बताए ।
