धनगढी । सुदूरपश्चिम प्रदेशका भौतिक पूर्वाधार विकासमन्त्री ओमविक्रम भाट ‘सरल’ले विगतका कमजोरी केलाएर त्यसलाई सुधार गरेर नयाँ बजेट ल्याउने गरि सरकार अगाडि बढेको बताएका छन् । आइतबार धनगढीमा आयोजित पत्रकार भेटघाटमा बोल्दै मन्त्री भाटले यस्तो बताएका हुन् ।

उनले भने ‘बजेटमा समस्या आएर नै यो अवस्था पैदा भएको हो । हिजो जुन कारणले बजेट फेल भएको थियो । त्यो अवस्था हामी आउन दिदैनौँ ।’

त्यस्तै,योजना माग्नका लागि मन्त्रालय,बजारमा लाइन लाग्ने एउटै व्यक्तिले धेरै योजनाका सिफरिस ल्याउने गरिएको बताउँदै त्यसको सहजता र वास्तविक आवश्यकता पहिचानका लागि मन्त्रालयले गुगल फर्म मार्फत योजना माग गरेको बताए ।

‘जो वास्तविक पीडित हो,जहाँ योजना आवश्यक छ । उनीहरु यहाँ पुग्न नसक्ने अवस्था पनि छ । तसर्थ यी समस्या समाधानका लागि गुगल फर्मबाट योजना माग गरेका हौँ’ उनले भने ‘अहिले त छोटो समय छ कति गर्न सकिन्छ थाहा छैन् । पछिल्ला वर्षमा यसको प्रयोगले योजना छनोटमा सहज हुन्छ ।’

त्यस्तै,मन्त्री भाटले बजेट निर्माण प्रकृया द्रुत गतिमा अगाडि बढेको बताउँदै सरकारले छिट्टै ल्याउने बताए । उनले अर्को प्रशंगमा बोल्दै मन्त्री भाटले नेपाली कम्युनिष्ट पार्टी (नेकपा) संसदीय दलभित्र कुनै विवाद नरहेको स्पष्ट पारे । उनले भने ‘माननीय ज्यूहरुले सुधारका लागि सुभाव दिनुभएको छ । उहाँ आफैले पनि सामाजिक सञ्जालमा पनि संसदीय दलमा कुनै विमत्ति नभएको कुरा लेख्नुभएको छ ।’