बर्दिया – सशस्त्र र नेपाल प्रहरीले बेग्लाबेग्लै तीन ठाउँबाट लागूऔषध ब्राउन सुगरसहित तीन जनालाई पक्राउ गरेको छ । मंगलबार साँझ बढैयाताल गाउँपालिका—२ फुटाहाबाट सशस्त्र प्रहरी बल र नेपाल प्रहरीको संयुक्त गस्ती टोलीले करिब ४ ग्राम लागूऔषध ब्राउन सुगरसहित दुई जनालाई पक्राउ गरेको छ ।
सशस्त्र प्रहरी पोष्ट फुटाहाका सशस्त्र सहायक निरीक्षक दुर्गा ढुंगानाको कमाण्डमा खटिएको टोली र नेपाल प्रहरीले संयुक्त रुपमा लागूऔषधसहित बर्दिया बढैयाताल गाउँपालिका १ का १६ वर्षीय किशोर र बाँके कोहलपुर नगरपालिका २ का १९ वर्षीय तिर्थराम सुनारलाई पक्राउ गरेको छ ।
सशस्त्र सहायक निरीक्षक ढुंगानाले भारतको बलैगाउ हुँदै नेपाल सीमा प्रवेश गर्दा शंका लागी चेकजाच गर्दा लागूऔषध उनीहरुबाट बरामद गरेको बताए । उनीहरुलाई कारबाहीका लागि इलाका प्रहरी कार्यालय, मैनापोखर बुझाएको उनले जनाए ।
यसैगरी प्रहरीले बढैयाताल गाउँपालिकास्थित नेपाल भारत सीमामा ३ ग्राम ७ सय ८० मिलीग्राम लागूऔषध ब्राउन सुगरसहित एक जनालाई पक्राउ गरेको छ । प्युठान जिल्ला प्युठान नगरपालिका ७ पुन्य खोलाका २७ वर्षीय बद्री थापा मगरलाई पक्राउ गरेको जिल्ला प्रहरी कार्यालय, बर्दियाले जनाएको छ ।
