धनगढी- धनगढीमा सञ्चालित दुईवटा कवाड सञ्चालकलाई राजस्व छली गरि अवैध कारोबार गरेको आरोपमा कारबाही गर्न माग गरिएको छ । नेपाल पत्रकार महासंघ कैलालीमा हुलाकमार्फत युवा संघ नेपालको नामबाट आएको पत्रमा धनगढीका दुई सञ्चालक माथि छानविन गरि कारबाही गर्न माग गरिएको हो ।
प्राप्त पत्र अनुसार धनगढीमा हरेन्द्र चौधरी र मुन्ना जैसवालले कवाडी सामानको अबैध कारोबार गरिरहेकाले उनीहरु माथि छानविन गरि कारबाही गर्न माग गरिएको छ । चौधरीले चोरीका मोटरसाइकल, साइकल, ब्याट्री, भाँडाकुँडा, चोरीका ग्याविन, जालीलगायतका सामान खरिद गरि विक्री गर्ने गरेको आरोप छ । उनले चारीका सामान खरिद गरेर धनगढी–३ मा जम्मा गर्ने र वडा नम्बर २ मा कटिङ गर्ने गरेको पत्रमा उल्लेख छ ।
यस्तै जैसवालले धनगढी–३ र ४ नम्बर वडामा दर्ता नगरि कवाडी सामानको कारोबार गरिरहेको आरोप छ । उनीसंग दोहोरो नागरिकतासमेत रहेको आरोप लगाइएको छ । उनीहरु दुबै जनाले ३/४ वर्षसम्म नविकरण नभएका यातायातका साधनहरु यातायात कार्यालयमा दाखिला खारेज नगरि रातारात कटिङ गर्ने कार्यमा संलग्न रहेको आरोप लगाइएको छ ।
पत्र अनुसार उनीहरुले पत्रकार पालेका छौं र सम्बन्धीत निकायका हाकिम पालेका छौं भनेर नविकरण नभएका र चोरीका गाडी तथा सामान खरिद गर्ने गरेका छन् । निज दुई जनामाथि आवश्यक छानविन नगरि कारबाही नगरिएमा सम्बन्धित निकायको नाममा मुद्दा हाल्ने चेतावनीसमेत दिइएको छ । पत्रमा यातायात कार्यालय, राजश्व कार्यालय, पत्रकार महासंघ र अख्तियार गरि चारवटा कार्यालयको नाम उल्लेख गरिएको छ ।
युवा संघ नेपालले पत्रसंगै कवाडी सामान र ती सामान कटिङ गर्ने स्थानको फोटोसमेत प्रमाणका रुपमा पठाएको छ । जसमा पूराना साना ठूला साधन र विभिन्न कवाडी सामान देख्न सकिन्छ ।
