काठमाडौं- नेकपा एकीकृत समाजवादी (एस)ले सरकारमा सहभागिताका लागि कति मन्त्रालय पाउने भन्ने टुंगो नलागे पनि मन्त्री बन्नेको नाम भने करिब टुंगिएको छ । राम्रा तीन मन्त्रालय माग गरिरहेको नेकपा एसले मन्त्रीका लागि तीन जनाको नाम टुंग्याएको हो ।
यद्यपि पार्टीले औपचारिक रुपमा निर्णय भने गरिसकेको छैन । उपमहासचिव प्रकाश ज्वालाले गठबन्धनमा आफूले पाउने मन्त्रालयको सङ्ख्या टुङ्गो लागेपछि सरकारमा पठाउने नेताहरूको नाम टुंग्याउने गरी छलफल भएको बताएका छन् ।
स्रोतका अनुसार एकीकृत समाजवादीले तीन मन्त्रालय पाए पार्टी उपाध्यक्ष डा. बेदुराम भुसालको नेतृत्वमा प्रकाश ज्वाला र भानुभक्त जोशीलाई मन्त्री बनाउने तयारी गरिसकेको छ ।
मंगलबार पार्टी कार्यालय आलोकनगरमा बसेको सचिवालय बैठकले आफूहरूले दाबी गर्दै आएका तीन मन्त्रालयबाट पछि नहट्ने निर्णय गरेको बताइएकाे छ ।
गृह नभए भौतिक पूर्वाधार तथा यातायात मन्त्रालयमा चित्त बुझाउन तयार भए पनि तीन मन्त्रालयबाट घट्न नसक्ने मंगलबार प्रधानमन्त्रीलाई भेटेर नेताहरूले भनिसकेका छन् । तर प्रधानमन्त्री प्रचण्डले नेकपा एकीकृतलाई दुई मन्त्रालय दिने प्रस्ताव गरेका छन् ।
