धनगढी- नेपाल उद्योग वाणिज्य महासंघ चुनाव नजिकिएसँगै देश दौडाहामा निस्केका कैलाली उद्योग वाणिज्य संघका अध्यक्ष पुष्पराज कुँवर र कञ्चनपुर उद्योग वाणिज्य संघका अध्यक्ष पीताम्बर जोशी मधेस प्रदेश पुगेका छन् ।
कुँवर र जोशीले महासंघको केन्द्रीय कार्यकारिणी समितिको जिल्ला नगरको (खुल्ला तर्फ) बाट सदस्यमा उम्मेदवारी घोषणा गरेपछि देशभरका उद्योगी व्यवसायीलाई भेटघाटमा सक्रियता बढाएका हुन् ।
बुधवार धनगढीबाट चुनावी अभियान सुरु गरेका कुँवर र जोशीले बिहीबार मधेस प्रदेश पुगेर त्यस जिल्लाका उद्योग वाणिज्य संघका अध्यक्षसहित उद्योगी व्यवसायीहरुसंग भेट गर्दै चुनावमा सहयोग गर्न आग्रह गरेका छन् ।
उद्योगी व्यवसायीहरुलाई बिहीबार भेट गर्दै अध्यक्ष द्वयले सुदूरपश्चिम र मधेसलाई जोडने उद्देश्यसहित चुनावलाई पनि मध्यनजर गर्दै आफूहरू मधेससम्म पुगेको बताए । मधेसका व्यवसायीहरुसंग सुदूरपश्चिम जहिले पनि हातेमालो गरेर अगाडि बढ्न तयार रहेको धारणा राखे।
खुल्ला सिमानाकाले गर्दा मधेस र सुदूरपश्चिम प्रदेशको समस्या एउटै रहेको बताए ।
भेटका क्रममा त्यहाँका उद्योगी व्यवसायीहरुले चुनावमा जीतको अग्रिम शुभकामना दिँदै आफूहरूको साथ सहयोग रहने प्रतिबद्धता जनाए । महासंघको ५७ औँ चुनावी साधारण सभा यही चैत्र २८ र २९ गते हुँदैछ ।
