काठमाडौं- प्रधानमन्त्री पुष्पकमल दाहाल ’प्रचण्ड’ छिमेकी देश चीनको निम्तो बेवास्ता गर्दै अर्को छिमेकी देश भारत भ्रमणको अन्तिम तयारीमा छन् । प्रधामन्त्री बनेपछि पहिलो विदेश भ्रमण भारत नै हुने बताएका प्रचण्ड चीनको निम्तिलाई समेत आनाकानी गर्दै अन्ततः भारत भ्रमणमा निस्किने भएका हुन् ।
माओवादी केन्द्रका अध्यक्ष समेत रहेका प्रधानमन्त्री पुष्पकमल दाहाल ’प्रचण्ड’ वैशाख तेस्रो साता तिर भारत भ्रमणमा निस्किने भएका छन् । भारतीय समकक्षी नरेन्द्र मोदीको निमन्त्रणमा प्रचण्ड भारत भ्रमणमा निस्किने भएका हुन् ।
नेपालका लागि भारतीय राजदूत नविन श्रीवास्तव प्रधानमन्त्री प्रचण्डलाई भारत भ्रमणको औपचारिक निम्तो दिँदै भ्रमणको चाँजोपाँजो मिलाउन दिल्ली गएका थिए ।
प्रधानमन्त्री भएलगत्तै प्रचण्डलाई भारतीय प्रधानमन्त्री मोदीले भ्रमणको निम्तो दिएका थिए । तर, नेपालको आन्तरिक राजनीतिमा भएको उचारचढावले प्रधानमन्त्रीको भारत भ्रमण ढिला हुँदै आएको थियो ।
सरकारले लगभग पूर्णता पाएको र आन्तरिक समस्याहरू समाधानतर्फ उन्मुख भएको महशुस गरेपछि भारतले प्रधानमन्त्री प्रचण्डको भारत भ्रमणको मिति पक्का गरेको हो ।
चीनले समेत प्रधानमन्त्री प्रचण्डको भारत भ्रमणलाई लिएर छलफल अघि बढाएको छ । तर, प्रचण्डले चीन भन्दा पहिले भारत भमणमा जान चाहेकाले चीन भ्रमणको विषय धकेलिएको बताइन्छ ।
कुटनीतिक वृत्तमा प्रचण्डले भारतलाई सन्तुलनमा ल्याउन पनि भारत भ्रमणलाई प्राथमिकता राखेको बताइएको छ ।
