धनगढी- कैलालीको कैलारी गाउँपालिकामा कार्यरत स्वास्थ्यकर्मीले तलब माग गर्दै सङ्घर्षका कार्यक्रम घोषणा गरेका छन् । तीन महिनादेखि तलब नपाएको भन्दै स्वास्थ्यकर्मीले सङ्घर्षका कार्यक्रम घोषणा गरेका हुन । कैलारी गाउँपालिकाको लिखित सहमतिको आधारमा समायोजन संशोधन र समायोजन मिलान भई आएका विभिन्न तहमा कार्यरत स्वास्थ्यकर्मीले तीन महिनादेखि तलब नपाएको जनाइएको छ ।
नियमित मासिक रूपमा पाउनु पर्ने तलब र भत्ता नपाउँदा पारिवारिक अवस्था दयनीय बन्दै गएको स्वास्थ्यकर्मीले जनाएका छन् । तलब नपाउँदा घर खर्च चलाउन, बालबच्चाको शैक्षिक खर्च जोहो गर्न समस्या भएको उनीहरूको भनाइ छ । यथाशीघ्र तलब माग गर्दै गाउँपालिकामा कार्यरत १४ जना स्वास्थ्यकर्मीले गाउँपालिकाका अध्यक्ष राजसमझ चौधरीलाई ज्ञापन पत्र बुझाएका छन् ।
यसै गरी, आगामी आर्थिक वर्ष २०८०/८१ को लागि सङ्घीय सरकारबाट बजेट व्यवस्था भई नआएसम्म मासिक रूपमा स्थानीय तहले नै तलब भुक्तानीको ग्यारेन्टी गर्नु पर्ने स्वास्थ्यकर्मीहरूको माग छ । उनीहरूले स्वास्थ्य संस्था सञ्चालन तथा व्यवस्थापन खर्च अविलम्ब उपलब्ध गराउन, स्वास्थ्यकर्मीलाई गाउँपालिकाको अन्य कर्मचारी सरह इन्धन, खाजा लगायतका अन्य प्रोत्साहन उपलब्ध गराउन गाउँपालिकाको कार्यालयसँग माग गरेका छन् ।
माग पूरा गराउनका लागि वैशाख १० देखि १५ गतेसम्म कालो पट्टी बाँधेर काम गर्ने, सुनुवाइ नभए वैशाख १५ गतेबाट अत्यावश्यकबाहेक सबै सेवा बन्द गर्ने लगायतको दबाबमूलक कार्यक्रमहरू अगाडि सारेको गाउँपालिकाका स्वास्थ्य शाखा प्रमुख सिनियर अहेब नरेशकुमार चौधरीले बताए । यसै गरी, मासिक रूपमा पेस गर्नु पर्ने र अनलाइन इन्ट्री गर्नु पर्ने प्रतिवेदन पेस नगर्ने जनाइएको छ । माग पूरा नभए आन्दोलनका थप कार्यक्रम सार्वजनिक गर्दै जाने प्रमुख चौधरीले बताए ।
