बैतडी- सुदूरपश्चिम प्रदेश सरकारका मुख्यमन्त्री कमलबहादुर शाहले मेलौली नगरपालिकामा आयोजित बृहत् स्वास्थ्य शिविरको शुक्रबार उद्घाटन गरे । बैतडी धनगढी समाज, धनगढी नेत्रालय, मेलौली नगरपालिका र च्यारिटी फाउन्डेसनद्वारा संयुक्त रूपमा आयोजित शिविर तीन दिनसम्म सञ्चालन हुनेछ ।
बृहत् स्वास्थ्य शिविरमा आँखाको मोतीबिन्दु, जलबिन्दु, आँखामा मासु पलाएको समस्याको उपचार, हाडजोर्नी तथा नसा रोग चिकित्सा, प्रसूति तथा स्त्री रोग, बालरोग, दन्त रोग, छाला तथा यौन रोग, कुष्ठ रोगको निःशुल्क उपचार हुने स्वास्थ्य कार्यालय बैतडीले जानकारी दिएको छ ।
स्वास्थ्य शिविर उद्घाटन गर्नुअघि मुख्यमन्त्री शाहले सञ्चारकर्मीसँग कुराकानी गर्नुहुँदै उपनिर्वाचनपछि प्रदेश सरकारले पूर्णता पाउने बताए । नेपाल प्रेस युनियन बैतडीद्वारा बैतडीको गोठलापानीमा शुक्रबार आयोजित पत्रकार सम्मेलनमा मुख्यमन्त्री शाहले केन्द्रमा गठबन्धन सरकार बनेकाले सोहीअनुसार प्रदेश सरकार बन्ने बताए ।
मुख्यमन्त्री शाहलाई नेकपा (माओवादी केन्द्र), नेकपा (एकीकृत समाजवादी) र नागरिक उन्मुक्ति पार्टीको समर्थन रहेको छ । पत्रकार सम्मेलनमा मुख्यमन्त्री शाहले जिल्ला भ्रमण गरेर वस्तुस्थितिका आधारमा आगामी वर्षको बजेट र कार्यक्रम तर्जुमा गर्ने बताए ।
मुख्यमन्त्री शाहले भने, “मैले प्रदेशका सबै जिल्लामा पुग्ने कोसिस गरिरहेको छु । जिल्लाको वस्तुस्थिति बुझेर बजेट निर्माणमा सहयोग पुग्ने अपेक्षा गरेको छु ।” उनले शिक्षा, स्वास्थ्य, कृषि र रोजगारका क्षेत्रलाई प्राथमिकतामा राखेर प्रदेश सरकारले काम गरिरहेको बताए । उनले प्रक्रिया मिचेर आएका योजनाहरू अबका दिनमा कार्यान्वयन नहुने बताए ।
मुख्यमन्त्री शाहले भने, “पहुँचका आधारमा आएका योजनामा अनियमितताको कुरा सुनिएको छ । यो कुरालाई प्रदेश सरकारले पूर्ण रूपमा निरुत्साहित गर्नेछ ।” उनले प्रक्रियामार्फत आएका योजना मात्रै अब सञ्चालनमा आउने प्रस्ट पारे । उनले किसानलाई अनुदानभन्दा शून्य प्रतिशत ब्याजमा ऋण दिने गरी काम गर्ने कि भनेर छलफल भइरहेको बताए ।
