धनगढी – सुदूरपश्चिम प्रदेशका प्रदेश प्रमुख देवराज जोशीले दलित अधिकारका जति कुरा गरेपनि दोधारे चरित्रका कारण समाजमा विभेद कायम रहेको बताएका छन् ।

धनगढीमा शनिवार भएको लैंगिक समानता तथा सामाजिकरण सम्बन्धि स्थानिय तहका जनप्रतिनिधिहहरूको अभिमुखिकरण तथा प्रदेशस्तरिय सम्मेलनमा बोल्दै उनले यस्तो धारणा राखेका हुन् । ‘समाजमा रहेका व्यक्तिहरुको सिद्धान्त र व्यवहारमा फरक छ । दोधारे चरित्र छ । समाजमा नेतृत्व गर्ने व्यक्तिहरू ईमान्दार छैनन् । कार्यान्वयन क्षेत्र प्रभावकारी भएन । अधिकारका जति कुरा गरेपनि अझै विभेद कायम रहेको छ’ उनले भने ‘संविधानमा भएका व्यवस्थाबारे अझै पनि धेरै मानिसहरु जानकार छैनन । यसबारे पैरबी गर्न जरूरी छ । स–साना कमजोरीहरुलाई सच्याउँदै अघि बढ्न जरुरी छ ।’

उनले समाजमा रहेका विभेद हटाउन राजनीति भन्दा फरक गएर अघि बढ्न जरुरी रहेको बताए । ‘हरेक कुरालाई राजनीतिक आँखाले हेर्दा समस्या छ । जवरजस्त हष्तक्षेपले परिवर्तन हुँदैन । परिवर्तन हुन समय लाग्छ’ उनले भने ।

दलित महिला संघकी संस्थापक अध्यक्ष दुर्गा सोवले समाजमा सबै कुराको जागरूकता आएपनि सोच परिवर्तन हुन नसकेको बताइन । उनले पार्टि बलियो र नेतृत्व ईमान्दार भएमा विभेद अन्त्य गर्न सहज हुने बताइन् । उनले अहिले कानुन र संविधान बुझेकै मानिसहरुबाट विभेद तथा कानुन तोड्ने काम भइरहेको बताइन् ।

मन्त्रालयका निमित्त सचिव गणेशबहादुर सिंहको अध्यक्षतामा भएको कार्यक्रममा प्रदेशका स्थानीय तहका उपाध्यक्ष तथा दलित सदस्यहरुको सहभागिता रहेको छ ।

भोलीसम्म चल्ने सम्मेलनले प्रदेश घोषणापत्र जारी गर्दै सम्पन्न हुने दलित महिला संघकी केन्द्रिय महासचिव रेणु सिजापतिले जानकारी दिइन् ।