कैलाली- सार्वजनिक जग्गाहरुमा हुने अतिक्रमणको शृङ्खलाको सिकार विश्वविद्यालय र विद्यालयहरु पनि भएको देखिएको छ। सुदूरपश्चिमको टीकापुर बहुमुखी क्याम्पसको ३ सय बिघा जग्गा अतिक्रमणमा परेको छ। महालेखापरिक्षकको ६०औं प्रतिवेदन अनुसार सुदूरपश्चिनम विश्वविद्यालय अन्तर्गतको टीकापुर बहुमुखी क्याम्पसको ३ सय ८० बिघा जग्गा रहेकोमा ३ सय बिघा जग्गा अतिक्रमण भएको हो।

महालेखापरीक्षकको कार्यालयले भौतिक सम्पत्तिको खोज, सङ्कलन तथा जगेर्ना गर्न र समुचित तवरले अभिलेखीकरण गर्न गठित समितिको प्रतिवेदनअनुसार विश्वविद्यालय र मातहतका निकायको स्वामित्वमा ३० लाख ५० हजार बर्गमिटर जग्गा रहेको उल्लेख गरेको छ।

२०६२ सालमा तत्कालीन टीकापुर विकास समितिले क्याम्पस स्थापनाका लागि ३ सय ८० बिघा जग्गा क्याम्पसलाई दिएको भएपनि क्याम्पसले हालसम्म ८० बिघा मात्रै भोगचलन गरिरहेको छ। अन्य ३ सय बिघा जमिन राजनीति आडमा मुक्त कमैया तथा सुकुम्बासीको नाममा अतिक्रमण भएको छ।क्याम्पसको जमिन अतिक्रमण हुनु दुस्खद भएको टीकापुर क्याम्पसले जनाएको छ।

जग्गामा अहिले करिब १ हजार ५ सय घर–परिवारले टहरा बनाएर क्याम्पसको जमिन हड्पेका छन्। जग्गा अभावका कारण विद्यार्थीहरूको अध्ययनका लागि भौतिक संरचना र प्रयोगशाला भवन समेत निर्माण गर्न नसकेको टीकापुर क्याम्पसले जनाएको छ।

यस्तै महालेखाको प्रतिवेदनअनुसार नेपाल संस्कृत विश्वविद्यालयको केन्द्रीय कार्यालय र १२ आङ्गिक विद्यापिठ ९क्याम्पस०को स्वामित्वमा तराईमा १ हजार ७१८ बिघा १८ कठ्ठा र पहाडी क्षेत्रमा १०२ रोपनी ९ आना जग्गा रहेको देखिन्छ। जसमध्ये ४०८ बिघामा मोही कायम भएको र १२ बिघामा स्वामित्व विवाद रहेको उल्लेख छ।

दाङको देउखुरीमा रहेको १ हजार ३३६ बिघा तथा बेलझुण्डी क्षेत्रमा रहेको ३२६ बिघामध्ये ३५ बिघा समेत १ हजार ३७१ विगाहा जग्गा २०५८ सालदेखि विभिन्न व्यक्ति तथा समूहबाट अतिक्रमणमा परेको जनाइएको छ। उक्त जग्गा विश्वविद्यालय आफूले भोगचलन गर्न र आय आर्जनमा उपयोग गर्न सकिरहेको छैन। यस्तै, विभिन्न विद्यालयको जग्गा पनि अतिक्रमणमा परेको महालेखापरीक्षकको कार्यालयले उल्लेख गरेको छ।