कञ्चनपुर- कञ्चनपुर प्रहरीले भारतबाट ल्याइँदै गरेको १०० बोरा मल बरामद गरेको छ । कञ्चनपुरको पुनर्वास नगरपालिका–१० स्थित दोदा पुलबाट भन्सार छली ल्याएका ५० क्विन्टल (१०० बोरा) मल बरामद गरेको इलाका प्रहरी कार्यालय त्रिभुवनबस्तीका प्रहरी निरीक्षक नरेशराज मल्लले बताए ।
प्रहरीले से २ त २३७० नम्बरको ट्याक्टर समेत बरामद गरेको छ । बिहीबार इलाका प्रहरी कार्यालय त्रिभुवनबस्तीका प्रहरी निरीक्षक मल्ल नेतृत्वको टोलीले भन्सार छली ल्याएको मल बरामद गरेको हो ।
भारतबाट ल्याएको मल कृष्णपुरतर्फ गइरहेको अवस्थामा बरामद गरिएको प्रहरीले जनाएको छ । एक लाख ५० हजार मूल्य बराबरको मल कारवाहीको लागि त्रिनगर भन्सार कार्यालय कैलालीलाई बुझाएको प्रहरीले जनाएको छ ।
