दार्चुला- शनिबार बिहानैबाट सीमा नदी महाकालीमा पानीको सतह बढेको छ । शुक्रबार रातिको वर्षा र भारतले धौलीगंगा बाँध खोल्दा महाकालीमा पानीको सतह बढेको प्रशासनले जनाएको छ ।
जिल्ला प्रशासन कार्यालयका अनुसार बुधबार सूचना प्रकाशित गरी शनिबार बिहान ५ बजेदेखि बेलुकी ८ बजेसम्म बाँधका ढोका खुल्ने जनाइएको थियो । भारतीय प्रशासनले सिल्ट सरसफाइ गर्ने भन्दै नेपाली प्रशासलाई जानकारी पठाएको थियो । नदी किनारका बस्तीका नागरिकलाई सतर्कता अपनाउन आग्रह गरिएको छ ।
धौलीगंगा बाँधको ढोका खोलेपछि ब्यास गाउँपालिका–५ स्थित स्याकु गाउँको मुनिबाट महाकाली नदीमा मिसिने हुनाले त्यहाँदेखि तल लालीसम्मका तटीय बस्तीका स्थानीयमा नदीमा पानी बढ्ने बित्तिकै त्रास छाउने गर्छ ।
बिहानैबाट नदीमा पानीको सतह बढेपछि तटीय भेगमा बसोबास रहेका स्थानीय नदीले कटान गर्ने हुँदा त्रसित भएका छन् । भारतले यो भन्दा पहिले पनि गत आसार २६ गते बिहान ५ बजेदेखि बेलुकी ८ बजेसम्म बाँधका ढोका खोल्दा जिल्लाका नदी किनारका बस्ती नजिक कटान गरेको थियो ।
महाकाली नगरपालिका–१ र दुहु गाउँपालिका–३ को श्रीबगर बस्तीको मुनि कटान भइरहेको स्थानीय बताउँछन् । भारतले वर्षात्को समयमा बेला–बेला बाँधका ढोकाहरु खोल्दै आएको छ ।
