धनगढी- कैलालीमा लागु औषध सेवन गरी गाडी चलाउने दुई जना सवारी चालक पक्राउ परेका छन्। जिल्लाको धनगढी उपमहानगरपालिका वडा नम्बर १३ राजपुर स्थित मोहना–अत्तरिया ६ लेन सडक खण्डमा लागु औषध सेवन गरी गाडी चलाउने दुई जना पक्राउ परेका हुन्।
ट्राफिक प्रहरी कार्यालय कैलाली र सु.प प्रदेश प्रहरी अस्पताल धनगढी कैलालीको संयुक्त प्रहरी टोलीले पाँच जना सार्वजनिक सवारीसाधन चलाउने चालकलाई चेकजाँचका क्रममा दुई चालकले लागूपदार्थ सेवन गरी चलाई राखेको भेटिएपछि पक्राउ गरेको हो।
पक्राउ पर्नेमा सु.प.प्र.०२–००१ ज ३७४ विङ्गर चालक कञ्चनपुर बेदकोट नगरपालिका ३ का २२ बर्षिय रमेश टमटा र रा १ च १४७५ नम्बरको जिप चालक दाङ बंगलाचुली गाउँपालिका ४ का २५ बर्षिय सोनु नेपाली रहेका छन्।
उनीहरूलाई नियन्त्रणमा लिई आवश्यक अनुसन्धान तथा कारबाहीका लागि जिल्ला प्रहरी कार्यालय कैलाली पठाइएको ट्राफिक प्रहरीले जनाएको छ।
जिल्ला ट्राफिक प्रहरी कैलालीले लागु औषध नियन्त्रण महाअभियानअन्तर्गत प्रविधियुक्त लागूपदार्थ सेवन चेकिङ यन्त्र (लागु औषध परीक्षण कीट) मार्फत सवारी चेकिङ गरिरहेको छ।
यसअघि शनिवार भदौ २ गते मोहना–अत्तरिया ६ लेन सडक खण्डमा लागूपदार्थ (ब्राउन सुगर) सेवन गरी गाडी चलाउने सात जना सवारी चालक पक्राउ परेका थिए।
