धनगढी– कञ्चनपुर भन्सार कार्यालयले बिस्कुट भनेर पठाएको सामान बरामद गरेर हेर्दा कपडा भेटिएको छ । प्रज्ञापनपत्रमा बिस्कुट उल्लेख गरेर कञ्चनपुर भन्सार कार्यालयले पठाएको समान बिहीबार सशस्त्र प्रहरीको केन्द्रीय ब्युरो टोलीले बरामद गरेको हो । बरामद गरिएको सामान बिस्कुट नभई कपडा भएको सशस्त्र प्रहरीले जनाएको छ ।
टोलीले भिमदत्त नगरपालिका वडा नम्बर १० बनगाउँ पुलमा दिउँसो ३ बजे सो कपडा बरामद गरेको हो । सशस्त्र प्रहरीका अनुसार बिस्कुट भनेर भन्सार कार्यालयले पठाएको सो पोकामा ५५ पिस साडी र ५८ पिस हाप पाइन्ट फेला परेको छ ।
सशस्त्र प्रहरीले बरामद गर्ने बेला बिस्कुटनै उल्लेख भएर आएपनि बरामद पश्चात कार्यालयले सच्याएर प्रज्ञापनपत्र पठाएको समेत पाइएको छ । केही दिनअघि पनि कञ्चनपुर भन्सार कार्यालयबाटै तरकारी भनेर पठाएको पेटीमा अनार स्याउलगायत फलफुल भटिएको थियो ।
अत्तरियामा चेकजाँचको क्रममा सशस्त्र प्रहरीले सो समान बरामद गरेको थियो । यस बारेमा कञ्चनपुर भन्सार कार्यालयका भन्सार अधिकृत तथा सुचना अधिकारी प्रमानन्द जोशीले भन्सारबाट बिस्कुट उल्लेख गरी नपठाएको दावी गरे । उनले थोरै कपडा रहेको र सो व्यक्तिले बाटोमा गएर थप कपडा हालेको सूचना पाएपछि सशस्त्र प्रहरीले बरामद गरेर भन्सारमा बुझाएको बताए । उनले बिस्कुटका नाममा कपडा नपठाइएको दाबी गरे ।
