काठमाडौं- नेकपा (एमाले)का सांसद तारा लामा तामाङले सुदूरपश्चिमका भूकम्पपीडितलाई तत्काल राहत उपलब्ध गराउन सरकारसँग माग गरेका छन्। प्रतिनिधिसभाको बिहीबारको बैठकको शून्य समयमा बोल्दै सांसद लामाले भूकम्पपीडितले राहत नपाएकामा संसदमार्फत सरकारको ध्यानाकर्षण गराएका हुन्।
‘बझाङी जनता भूकम्पको त्रासमा छन्, हिजो पनि भूकम्प गएको छ। केही दिनअघिको भूकम्पले धनजन क्षति भएको सर्वविदितै छ,’ कञ्चनपुर क्षेत्र नम्बर १ बाट निर्वाचित सांसद लामाले भने, ‘सरकारले तदारुकताका साथ त्यहाँका जनतालाई राहत र सहयोगका लागि म अनुरोध गर्छु।’
१६ असोजमा बझाङमा केन्द्रविन्दु भएर गएको ६.३ म्याग्निच्युडको भूकम्पले एकजनाको ज्यान गएको थियो भने २७ जना घाइते भएका छन्। बझाङ, बाजुरा, बैतडी, डोटी, डडेल्धुरालगायत जिल्लामा हजारौँ घरमा क्षति पुगेको छ। बझाङमा बुधबार राति मात्र ५.३ म्याग्निच्युडको भूकम्प गएको छ।
केही दिनअघि मात्र बझाङ पुगेका प्रधानमन्त्री पुष्पकमल दाहाल ‘प्रचण्ड’ले अस्थायी आवासका लागि तत्काल ५० हजार उपलब्ध गराउने र पुनर्निर्माणका लागि प्याकेज घोषणा गर्ने बताएका थिए। भूकम्पपीडित अझै त्रिपालमा बसिरहेका छन्।
दुग्ध किसानलाई तत्काल पैसा उपलब्ध गराउन माग
सांसद लामाले सुदूरपश्चिमका दुग्ध किसानले दूधको पैसा पाउन नसकेकोबारे पनि संसदमार्फत सरकारको ध्यानाकर्षण गराएका छन्। दुग्ध विकास संस्थानले सुदूरपश्चिममा १५ असारदेखि दूधको पैसा रोकेको छ। ‘दसैँको मुखमा हजारौँ किसानको करोडौँ रुपैयाँ भुक्तानी नभएकाले दसैँमा चिन्तित मुद्रामा छन्,’ लामाले भने, ‘छिटोभन्दा छिटो सरकारले पैसा उपलब्ध गराउन निर्देशन जाओस्।’
