धनगढी- कैलालीको धनगढी उपमहानगरपालिका २ बाट लागु औषध सेवन गरी अटो चलाउने चालक पक्राउ परेका छन्। ट्राफिक प्रहरीले धनगढी वडा नम्बर २ स्थित भित्री सडक खण्डमा शनिवार दिउँसो सवारी चेकिङका क्रममा १८ बर्षिय अटो चालक रोशन सिंह साउदलाई पक्राउ गरेको हो।
सु.प.प्र.०१९००१ ह १९८२ नम्बरको अटोमा सिट क्षमता भन्दा बढी यात्रु राखी अटो चलाई रहेको अवस्थामा कञ्चनपुर पुनर्वास १० का साउदलाई नियन्त्रणमा लिएको प्रहरीले जनाएको छ।
नियन्त्रणमा लिएका चालकको लागु औषध परीक्षण किटको प्रयोग गरी स्वास्थ्य परीक्षण गर्दा लागु पदार्थ सेवन पोजेटिभ भेटिएको थियो। निज चालकलाई नियन्त्रणमा लिई थप आवश्यक अनुसन्धान तथा कारवाहीका लागी जिल्ला प्रहरी कार्यालय कैलाली पठाइएको छ।
