धनगढी- अन्तर्राष्ट्रिय युवा दिवसको अवसरमा प्रदेश युवा परिषद् सुदूरपश्चिमको आयोजनामा वृक्षारोपण तथा रक्तदान लगायतका सामाजिक कार्य गरिएका छन् । प्रदेश युवा परिषद् सुदूरपश्चिमको आयोजनामा धनगढीको शिवपुरी धाम परिसरमा वृक्षारोपण गरिएको छ । युवा परिषद्का पदाधिकारी तथा सदस्य, आम युवा वर्ग, गोजुरियो कराँते दो संघका प्रशिक्षार्थी, पदाधिकारी, नेपाली सेना लगायतको सहभागितामा धनगढीको शिवपुरी धाम परिसरमा वृक्षारोपण गरिएको हो ।
त्यहाँ ५ सय बढी विभिन्न फलफुल लगायतका बिरुवा रोपेको प्रदेश युवा परिषद् सुदूरपश्चिमका कार्यकारी सदस्य शेर बहादुर विष्टले जानकारी दिए । यस्तै युवा परिषद्कै आयोजनामा रक्तदान कार्यक्रम आयोजना गरिएको छ । रक्तदान कार्यक्रमबाट ३५ पिन्ट रगत सकंलन भएको कार्यकारी सदस्य विष्टले जानकारी दिए । उनका अनुसार परिषद्ले मानव सेवा आश्रममा खाद्यान्न वितरण समेत गरेको छ ।
युवाहरूको लगानी आफ्नै क्षेत्रमा लाउनुपर्छ र युवा समाजप्रतिपनि उत्तरदायी बन्नुपर्छ भन्ने सन्देश दिन अन्तर्राष्ट्रिय युवा दिवसका अवसरमा यी विविध सामासिक कार्य गरेको प्रदेश युवा परिषद् सुदूरपश्चिम प्रदेशका कार्यकारी उपाध्यक्ष युवराज कुँवरले बताए । सामाजिक क्षेत्रमा केही काम पनि हुने र युवाहरूमा जाँगर पलाउने हुँदा परिषद्ले यस्ता सामाजिक कार्य गर्दै आएको उनले बताए ।
युवाहरूले यस्ता सामाजिक कार्यमा सहभागी हुनुपर्छ र समाजप्रति उत्तरदायी बन्नुपर्छ भन्ने हेतुले वृक्षारोपण तथा रक्तदान कार्यक्रममा आफ्नो टिम सहित सहभागी भएको राष्ट्रिय गोजुरियो कराँते दो संघका महासचिव प्रकाश चन्दले बताए । समाजमा जन्मिसकेपछि समाजप्रति केही न केही उत्तरदायी बन्नुपर्नेमा उनले जोड दिए ।
यस्तै वृक्षारोपण तथा रक्तदानमा सहभागी भएका युवाहरुलेपनि समाजलाई केही फाइदा हुने किसिमले काम गर्नुपर्नेमा जोड दिए ।भोलिका कर्णधार युवाहरूबाटै सकारात्मक कामको सुरुवात हुनुपर्नेमा उनीहरूको जोड छ ।
