काठमाडौं- दादुरा रुबेला खोप अभियान, २०८० अन्तर्गत चैत ३ गतेसम्म साढे ५४ लाख बालबालिकाले खोप लगाएका छन् । स्वास्थ्य सेवा विभागको तथ्यांकानुसार ५४ लाख ४२ हजार ४६९ जनाले खोप लगाएका हुन् । लक्षित जनसंख्याको यो ९३ प्रतिशत हो । गएको फागुन १३ गतेदेखि सञ्चालित अभियानमा ५७ लाख ४२ हजार ९९३ बालबालिकामा खोप लगाउने सरकारको लक्ष्य छ ।
खोप कभरेजमा वाग्मती, गण्डकी, लुम्बिनी, कर्णाली र सुदूरपश्चिम प्रदेश अगाडि छन् । कोसी प्रदेशमा खोप कभरेज लक्ष्यभन्दा निकै कम छ । कोसीमा नौ लाख ११ हजार ८७१ बालबालिकामा खोप लगाउने लक्ष्य राखिएको छ । हालसम्म पाँच लाख ९४ हजार ८५० जनाले खोप लगाएका छन् ।
यस्तै, मधेश प्रदेशमा १९ लाख ४७ हजार १४२ जनामा खोप लगाउने लक्ष्य छ । हालसम्म १५ लाख ६ हजार ९६ बालबालिकाले खोप लगाएका छन् । अभियानअन्तर्गत तराईका २१ र काठमाडौं उपत्यकाका तीन गरी २४ जिल्लामा नौ महिनादेखि १५ वर्षसम्मका र अरू जिल्लामा नौ महिनादेखि पाँच वर्षसम्मका बालबालिकालाई खोप दिइँदै छ ।
नियमित खोप छुटेका बालबालिकालाई पनि खोप दिइँदै छ । १५ महिनाभित्र लगाउनुपर्ने नौ खोपका १८ मात्रामध्ये कुनै छुटेको भए सोही केन्द्रबाट उपलब्ध गराइन्छ । दादुरा संक्रमण एक व्यक्तिबाट १८ जनासम्ममा सर्न सक्ने, बालबालिकामा अपांगता हुन सक्ने, मुटुमा समस्या हुने साथै मृत्यु समेत हुन सक्ने जोखिम रहन्छ । यसको निश्चित औषधि उपचार नभएको र खोप नै संक्रमणबाट जोगिने एक मात्र उपाय भएकाले अभियानका समयमा बालबालिकालाई नछुटाई खोप लगाउन महाशाखाको अनुरोध छ ।
