धनगढी- सुदूरपश्चिम प्रदेशका दुई जना विनाबिभागीय मन्त्री रहेका दुई जनाले मन्त्रालयको जिम्मेवारी पाएका छन् । बिहीबार नागरिक उन्मुक्ति पार्टीका तर्फबाट सामाजिक विकास मन्त्रीमा लक्ष्मणकिशोर चौधरी र उद्योग, पर्यटन वन तथा वातावरण मन्त्रीमा खुशीराम डगौरा चौधरीले मन्त्रालयको जिम्मेवारी पाएका हुन् ।
प्रदेशको सामाजिक विकास मन्त्रीको जिम्मेवारी पाएका लक्ष्मण किशोर चौधरीले जनताले दिएको म्यान्डेट अनुसार नै सरकारमा सहभागी भएको बताए । पदभार ग्रहण गर्दै मन्त्री चौधरीले आफ्नो पार्टीले एक वर्ष पहिलेदेखि कांग्रेस नेतृत्वको सरकारलाई समर्थन दिएकोले हाल पदभार ग्रहण गर्नु सरकार सञ्चालनको प्रक्रिया मात्रै रहेको बताए ।
उद्योग पर्यटन वन तथा वातावरण मन्त्री खुशीराम चौधरीले पदभार ग्रहण कार्यक्रममा सञ्चारकर्मीहरुसँग प्रतिक्रिया दिँदै भने मूल नेतृत्वको सल्लाह अनुसार आफूहरुको समर्थन अहिलेका मुख्यमन्त्री कमल शाहलाई रहेको हो । आफूहरु जस्तो सुकै परिस्थिती आएपनि यो सरकारमा सहभागी भएको उनले बताए ।
शुक्रबार मात्रै नागरिक उन्मुक्ति पार्टी अध्यक्ष रञ्जिता श्रेष्ठको अध्यक्षतामा टीकापुरमा बसेको संस्थापक केन्द्रीय सदस्य र सांसदहरुको बैठकले नयाँ गठबन्धनलाई समर्थन गर्ने निर्णय गरेको थियो । तर निर्णय गरेको ४८ घण्टा नबित्दै नागरिक उन्मुक्तिकै प्रदेश सभा सदस्यले सो निर्णय मानेन ।
सो पार्टीको बैंठकले सुदूरपश्चिम प्रदेशमा नयाँ गठबन्धनलाई समर्थन गर्ने निर्णय गरेको थियो । मख्यमन्त्री कमलबहादुर शाह नेतृत्वको सरकारबाट समर्थन फिर्ता लिनुको सट्टा उल्टै पार्टी अध्यक्ष श्रेष्ठको निर्देशन विपरीत जिम्मेवारीसहित मन्त्री नै बनेर देखाइदिए । पार्टी अध्यक्ष श्रेष्ठले यसअघि पनि तत्काल समर्थन फिर्ता लिन निर्देशन दिएपनि सो निर्देशनलाई उनकै सांसदले टेरेनन् ।
सुदूरपश्चिममा उन्मुक्तिका सात सांसद छन् । तीमध्ये चार मन्त्री र एक राज्यमन्त्री गरी पाँच जना मन्त्री नियुक्त भएका छन् । काङ्ग्रेस नेतृत्वको सरकारमा १८ सांसद रहेकोमा मुख्यमन्त्रीसहित दुई मन्त्री छन् ।
