धनगढी- पशु स्वास्थ्य तथा पशु सेवा व्यवसायी परिषद्को अभिमुखीकरण गोष्ठी सम्पन्न भएको छ । परिषदले आइतबार धनगढीमा आयेजना गरेको दर्ता हुनेवाला पशु स्वास्थ्य तथा पशु सेवा व्यवसायीहरुका लागि परिषद् सम्बन्धी प्रदेश स्तरीय अभिमुखीकरण गोष्ठी सम्पन्न भएको हो ।
गोष्ठीमा मन्तव्य व्यक्त गर्दै सुदूरपश्चिम प्रदेशको भूमि व्यवस्था,कृषि तथा सहकारी मन्त्री टीका थापाले पशुक्षेत्रमा प्रदेश सरकारले सक्दो काम गरिरहेको बताइन् । उनले पशु वद्यशाला तथा बिक्री वितरण हुने ठाउँहरुमा अनुगमन भइरहेको बताउँदै रोग नियन्त्रणका लागि प्रदेश सरकारले काम गरिरहेको बताइन् । मन्त्रालयले सकेसम्म पशु क्षेत्र तथा रोग नियन्त्रणका लागि काम गर्ने उनले बताइन् ।
उनले सरकार स्थिर नहुँदा काम जनाले चाहे अनुसारको विकास हुन नसकेको बताइन् । उनले भनिन् ‘देशको विकास नहुँदा नागरिक अगाडि बढ्न सक्दैनन् । यसका लागि स्थिर सरकारका आवश्यक हुन्छ ।’
गोष्ठीमा परिषद्का रजिष्टार पूर्णबहादुर बुढाले पशु स्वास्थ्य तथा पशु सेवा व्यवसायी परिषद् ऐन २०७९ मा भएका व्यवस्थाका बारेमा कार्यपत्र प्रस्तुत गरेका थिए । त्यस्तै भेटेरिनरी अस्पताल तथा पशुसेवा विज्ञ केन्द्र कैलालीका प्रमुख डा.हेमराज अवस्थीले जुनोटिक रोग (रेबिज रोग नियन्त्रण) सम्बन्धि प्रदेशमा रेबिज रोगको चुनौती अवस्थालगायतका बारेमा प्रस्तुतिकरण गरेका थिए । परिषदका अध्यक्ष देवेन्द्रप्रसाद यादवको अध्यक्षतामा भएको गोष्ठिमा प्रदेशका पशु स्वास्थ्य व्यवसायी तथा पशु स्वास्थ्यकर्मीको सहभागिता रहेको थियो ।
