धनगढी- मेहनत गरे के हुँदैन , सबै चिज सजिलै चल्दो रहेछ भन्ने उदाहरणका पात्र बनेका छन करनकुमार सार्की । धनगढी उपमहानगरपालिका–३ बिशालनगर बस्ने सार्कीका आमा, छोराछोरी, श्रीमतीलगायत ७ जनाको परिवार छ।
पढ्ने ईच्छा हुँदाहुँदै पनि आर्थिक अवस्थाका कारण कक्षा ८ मै विश्राम लिनु परेको उनले बताए । पढेर ईन्जिनियर बन्ने चाहना अधुरो भयो अनि उनको जिउने आधार जुत्ता सिलाई बन्यो । जुत्ता सिलाईबाट ७ जनाको परिवारलाई पाल्न रातदिन मेहनत गर्न थालेको उनले बताए । मेहनतको कमाईले सजिलै बालबालिकाको पढाई लेखाई, जिविका चलाउन सजिलो हुँदै गएको उनको भनाई छ ।
आफूले पार्कमोड सु–सेन्टर संचालन गरेको ६ बर्ष भएको उनले बताए । पहिला बुवाले पनि जुत्ता सिलाएर हुर्काएको स्मरण गर्दै उनले भने ‘विदेश गएर काम गर्नु भन्दा नेपालमै पुर्ख्यौली पेशा अँगालेर बसेर केही गर्नुपर्छ भनेर यो पेशा अगाले हुँ।’
दिनको १ हजार ५ सय कमाई हुने गरेको उनले बताए । सार्कीले भने ‘यसरी हेर्दा कमाई महिनाको ४५ हजारसम्म हुने गरेको छ ।’ आफ्नो सपना साकार गर्न छोराछोरीलाई ईन्जिनियर पढाउने रहेको उनले बताए । उनले भने ‘छोरा,छोरी बोडिङ्ग स्कुलमा पढ्दै छन, यो पेशा अँगालेर आफू निकै सन्तुष्ट भएको छु।’
‘ छोराछोरीलाई ईन्जिनियर बनाउने मेरो एउटै सपना हो’, उनले भने ‘यसका लागि छिट्टै व्यापार विस्तार गरेर मागअनुसार जुता उत्पादन गर्ने लक्ष्य रहेको छ ।’
अहिले एक जना कर्मचारी सुमन मगरातीलाई ८ हजार तलब दिएर राखेको उनले बताए । करनले भने ‘अहिले धेरै युवाहरु कामको खोजीमा भारत लगायत तेस्रो मुलुकमा जानेको भिड लाग्ने गरेको छ । बिदेश गएर अर्काको देशमा पसिना बगाउनु भन्दा आफ्नै देशमा बगाउन सके देशको विकास हुन धेरै बेर लाग्ने छैन।’
