धनगढी- कैलाली भन्सार कार्यालय धनगढीले गत आव २०८०/८१ मा लक्ष्यको ६८ दशमलव ३६ प्रतिशत मात्रै राजस्व सङ्कलन गरेको छ । कार्यालयले गत आवमा लक्ष्य अनुसारको राजस्व सङ्कलन गर्न नसकेको हो ।
गत आवमा रु.११ अर्ब ५८ करोड २४ लाख राजस्व सङ्कलनको वार्षिक लक्ष्य रहेकामा रु.सात अर्ब ९१ करोड ८० लाखमात्रै राजस्व सङ्कलन भएको भन्सार कार्यालयका सूचना अधिकारी पवित्रकुमार खड्काले जानकारी दिए । उनका अनुसार गत आवका कुनैपनि महिना राजस्व सङ्कलन लक्ष्यमा पुग्न सकेको छैन् ।
साउनमा रु ७२ करोड ३५ लाख राजस्व संकलनको लक्ष्य रहेकोमा ४६ करोड ८२ लाख,भदौमा रु ८८ करोड ४० लाख लक्ष्य रहेकोमा ५१ करोड ९३ लाख,असोजमा रु ९७ करोड ८१ लाख लक्ष्य रहेकोमा ६३ करोड १४ लाख र कार्तिकमा रु ९७ करोड ५२ लाख ६१ करोड ४६ लाखमात्रै राजस्व सङ्कलन भएको उनले जानकारी दिए ।
उनका अनुसार मंसिरमा रु एक अर्ब दुई करोड २५ लाख लक्ष्य रहेकोमा ७३ करोड ३४ लाख, पुसमा रु एक अर्ब चार करोड १३ लाख लक्ष्य रहेकोमा ६८ करोड ९० लाख,माघमा रु ९२ करोड ६९ लाख लक्ष्य रहेकोमा ६६ करोड ६७ लाख,फागुनमा रु एक अर्ब ९८ लाख लक्ष्य रहेकोमा ६९ करोड एक लाखमात्रै राजस्व सङ्कलन भएको छ ।
चैतमा रु एक अर्ब ४७ लाख लक्ष्य रहेकोमा ७२ करोड १३ वैशाखमा रु ९९ करोड ८९ लाख लक्ष्य रहेकोमा ७५ करोड १७ लाख, जेठमा रु एक अर्ब ७५ लाख लक्ष्य रहेकोमा ८३ करोड ५३ लाख र असारमा रु एक अर्ब ९४ लाख लक्ष्य रहेकोमा ५९ करोड ६६ लाखमात्रै राजस्व सङ्कलन भएको भन्सार कार्यालयले जनाएको छ ।
भन्सार कार्यालयको आव २०७९/८० मा रु १२ अर्ब ३० करोड ६६ लाख राजस्व सङ्कलनको वार्षिक लक्ष्य रहेकामा रु आठ अर्ब २९ करोड ६३ लाख राजस्व सङ्कलन भएको थियो । जुन लक्ष्यको ६७ दशमलव ४१ प्रतिशत मात्रै रहेको कार्यालयले जनाएको छ
