धनगढी- कैलालीका किसान व्यवसायिक तरकारी खेतीबाट आत्मर्भिर बन्न थालेका छन् । पछिल्लो समय यहाँका किसान तरकारी खेतीबाट आत्मनिर्भर बन्न थालेका हुन् ।

जिल्लाको धनगढी उपमहानगरपालिका–६ शान्तिटोलका शेरुराम चौधरीले तरकारी खेती गरेको लामो समय भयो । उनले तरकारी खेतीबाट राम्रो आम्दानी गर्ने गरेको बताए ।

तरकारी खेतीबाटै आत्मनिर्भर भएको उनको भनाइ छ । उनले भने ‘मैले करिब १५ कठ्ठा जमीनमा तरकारी खेती गर्दे आएको छु । तरकारी खेती गर्न लागेको झण्डै २५/२६ वर्ष भयो । आम्दानी राम्रै हुने गरेको छ ।’
‘गाह्रो अप्ठ्यारो पर्दा अरुलाई ऋण माग्नु परेको छैन् । घर खर्च पनि राम्रै चलेको छ’, उनले भने ‘छोराछोरीको पढाइलेखाइ खर्च पनि यसैबाट चलेको छ ।’

उनले भने ‘मेरो अन्य आम्दानीको श्रोत केही छैन् । न मैले धान गहुँ बेच्छु । तरकारी खेती बाटै पाँच जनाको परिवारको खर्च टारेको छु ।’ तरकारी बिक्रीबाट भएको आम्दानीले छ वर्ष अगाडि मा चार कोठाको पक्की घर बनाएको उनले बताए । उनले भने ‘मेरो अम्दानी यही तरकारी खेती हो । न म कतै गएर रोजगारी गरेर पैँसा कमाए । यसबाटै भएको आम्दानीले पक्की घर पनि बनाए ।’

उनले तरकारी खेतीबाट वार्षिक पाँचदेखि छ लाखसम्म आम्दानी हुने गरेको बताए । उनले भने ‘तरकारी खेतीमा लगानी पनि कम नै लाग्छ । मेहनत भने धेरै लाग्छ । मेहनत गर्न सके राम्रै हुन्छ । व्यस्त पनि भइएको छ ।’ सिजन अनुसारका सबै किसिमका तरकारी लगाउने गरेको चौधरीले बताए । उनले अहिले बारीमा भिन्डी,बोडी,करेला,लौकालगायतका तरकारी फलेको बताए । चौधरीले भने ‘तरकारी बेच्न पनि समस्या हुँदैन् । धनगढी रहेको हाटबजारमा लगेर बेच्छौँ ।’

‘यहाँ सिचाइको समस्या छ । सिँचाइको राम्रो व्यवस्था हुनसके तरकारी खेतीबाट अझ राम्रो आम्दानी गर्न सकिन्थ्यो ।’ उनले भने । घर छोडेर बाहिर गएर मजदुरी गर्नु भन्दा आफ्नै घरमा बसेर काम गर्दा आनन्द हुने उनको भनाइ छ । चौधरी जस्तै यहाँका अन्य किसान पनि तरकारी खेतीबाट आत्मनिर्भर बन्न थालेका छन् ।